kabhi khula hi nahin kitnon par ki kya hai safar

kabhī khulā hī nahīñ kitnoñ par ki kyā hai safar

qadam-qadam pe tire jaise aa.ina hai safar

chalo batātā huuñ al-muḳhtasar ki kyā hai safar

jahāñ se aa.e ho us samt lauTnā hai safar

kahīñ pe jangeñ laḌīñ to kahīñ paḌāo kiyā

ham aise ḳhāna-ba-doshoñ kā aasrā hai safar

thakan safar kī mirā hausla baḌhātī hai

na hoñ sa'ūbateñ rah meñ to be-mazā hai safar

kahīñ to hogī hī manzil maiñ DhūñD lūñgā use

huzūr merā pasandīda mashġhala hai safar

kisī kisī pe safar tā-hayāt be-mā'nī

kisī kisī ke liye zindagī-numā hai safar

'ajīb dukh hai ham ujḌe hue qabīloñ kā

hamāre vāste sangīn mas.ala hai safar

kabhi khula hi nahin kitnon par ki kya hai safar

qadam-qadam pe tere jaise aaina hai safar

chalo batata hun al-muKHtasar ki kya hai safar

jahan se aae ho us samt lauTna hai safar

kahin pe jangen laDin to kahin paDao kiya

hum aise KHana-ba-doshon ka aasra hai safar

thakan safar ki mera hausla baDhati hai

na hon sa'ubaten rah mein to be-maza hai safar

kahin to hogi hi manzil main DhunD lunga use

huzur mera pasandida mashghala hai safar

kisi kisi pe safar ta-hayat be-ma'ni

kisi kisi ke liye zindagi-numa hai safar

'ajib dukh hai hum ujDe hue qabilon ka

hamare waste sangin masala hai safar