kabhi kuza kabhi kasa kabhi saghar banate hain

kabhī kuuza kabhī kaasa kabhī sāġhar banāte haiñ

ye kaisī pyaas kī taskīn kūza-gar banāte haiñ

banāte haiñ safīne jo samundar paar karne ko

vahī patvār ke hamrāh kyoñ langar banāte haiñ

chalo maanā ke mehnat se makāñ tum hī banāte ho

mohabbat se magar apnī hamīñ to ghar banāte haiñ

jo pahle hathkaḌī aur beḌiyāñ thiiñ bint-e-havvā kī

ab un kī shakl ke ahl-e-jahāñ zevar banāte haiñ

phir us kā vaqt-e-ruḳhsat lauT kar aanā palaT jaanā

ham apnī aañkh meñ har raat vo manzar banāte haiñ

tabī.at ḳhud-baḳhud maa.il kiyā kartī hai jazboñ ko

kabhī kyā soch kar ham dost yā dilbar banāte haiñ

vo bhūlā phir kisī bhī shaam ghar vāpas nahīñ lauTā

'hinā' maañ baap jis kā aaj bhī bistar banāte haiñ

kabhi kuza kabhi kasa kabhi saghar banate hain

ye kaisi pyas ki taskin kuza-gar banate hain

banate hain safine jo samundar par karne ko

wahi patwar ke hamrah kyon langar banate hain

chalo mana ke mehnat se makan tum hi banate ho

mohabbat se magar apni hamin to ghar banate hain

jo pahle hathkaDi aur beDiyan thin bint-e-hawwa ki

ab un ki shakl ke ahl-e-jahan zewar banate hain

phir us ka waqt-e-ruKHsat lauT kar aana palaT jaana

hum apni aankh mein har raat wo manzar banate hain

tabiat KHud-baKHud mail kiya karti hai jazbon ko

kabhi kya soch kar hum dost ya dilbar banate hain

wo bhula phir kisi bhi sham ghar wapas nahin lauTa

'hina' man bap jis ka aaj bhi bistar banate hain