kabhi maine unhen puchha nahin hai

kabhī maiñ ne unheñ pūchhā nahīñ hai

unheñ bhī hai mohabbat yā nahīñ hai

ijāzat ho to maiñ ye arz kar duuñ

salīqa aap kā achchhā nahīñ hai

vahī chhāyā huā hai zindagī par

vo jis ko aaj tak dekhā nahīñ hai

sitam ālām mahrūmī tabāhī

mirī taqdīr meñ kyā kyā nahīñ hai

abhī kuchh aur bhī jaur-o-sitam hoñ

abhī sadmoñ se dil TuuTā nahīñ hai

na jaane kis ghaḌī chhin jaa.e mujh se

ye zālim jism bhī merā nahīñ hai

mirī taqdīr hī meñ Thokareñ thiiñ

mujhe duniyā se kuchh shikva nahīñ hai

ajab insān hai duniyā meñ vo bhī

sadā-e-vaqt jo suntā nahīñ hai

kahāñ rahte ho 'āsī' āj-kal tum

ka.ī din se tujhe dekhā nahīñ hai

kabhi main ne unhen puchha nahin hai

unhen bhi hai mohabbat ya nahin hai

ijazat ho to main ye arz kar dun

saliqa aap ka achchha nahin hai

wahi chhaya hua hai zindagi par

wo jis ko aaj tak dekha nahin hai

sitam aalam mahrumi tabahi

meri taqdir mein kya kya nahin hai

abhi kuchh aur bhi jaur-o-sitam hon

abhi sadmon se dil TuTa nahin hai

na jaane kis ghaDi chhin jae mujh se

ye zalim jism bhi mera nahin hai

meri taqdir hi mein Thokaren thin

mujhe duniya se kuchh shikwa nahin hai

ajab insan hai duniya mein wo bhi

sada-e-waqt jo sunta nahin hai

kahan rahte ho 'asi' aaj-kal tum

kai din se tujhe dekha nahin hai