kabhi mehr-o-mah kabhi kahkashan kabhi aasman se guzar gaya

kabhī mehr-o-mah kabhī kahkashāñ kabhī āsmāñ se guzar gayā

mirī rif.atoñ pe vo sar-nigūñ maiñ to lā-makāñ se guzar gayā

ka.ī manziloñ ke nishāñ mile maiñ har ik nishāñ se guzar gayā

mire pīchhe pīchhe kārvāñ maiñ jahāñ jahāñ se guzar gayā

milā but-kada to kabhī haram kahīñ ruk sake na mire qadam

tirī justujū meñ tirī qasam maiñ kahāñ kahāñ se guzar gayā

na kalī meñ thī kahīñ kuchh kashish the fasurda phuul ravish ravish

maiñ nigāh sarsarī Daal kar tire gulsitāñ se guzar gayā

na hī chāra-gar koī mill sakā na ilāj-e-ġham mirā ho sakā

mujhe mil sakī na davā-e-dil maiñ har ik dukāñ se guzar gayā

yahāñ apne the vahāñ ġhair the ajab ek manzar-e-yās thā

maiñ kabhī yahāñ se guzar gayā maiñ kabhī vahāñ se guzar gayā

kabhi mehr-o-mah kabhi kahkashan kabhi aasman se guzar gaya

meri rifaton pe wo sar-nigun main to la-makan se guzar gaya

kai manzilon ke nishan mile main har ek nishan se guzar gaya

mere pichhe pichhe karwan main jahan jahan se guzar gaya

mila but-kada to kabhi haram kahin ruk sake na mere qadam

teri justuju mein teri qasam main kahan kahan se guzar gaya

na kali mein thi kahin kuchh kashish the fasurda phul rawish rawish

main nigah sarsari Dal kar tere gulsitan se guzar gaya

na hi chaara-gar koi mill saka na ilaj-e-gham mera ho saka

mujhe mil saki na dawa-e-dil main har ek dukan se guzar gaya

yahan apne the wahan ghair the ajab ek manzar-e-yas tha

main kabhi yahan se guzar gaya main kabhi wahan se guzar gaya