kabhi meri har KHushi ko mere mehrban ne luTa

kabhī merī har ḳhushī ko mire mehrbāñ ne luuTā

kabhī merī anjuman ko mire pāsbāñ ne luuTā

kabhī bijliyāñ taḌap ke girīñ mere āshiyāñ par

jo bache the chaar tinke unheñ rāz-dāñ ne luuTā

the bachā bachā ke rakhe kuchh gul rah-e-chaman se

mujhe Daal kar qafas meñ unheñ bāġhbāñ ne luuTā

jo bahār ban ke aa.e vo ġhubār ban ke bhaTke

kabhī to sabā ne chheḌā kabhī hai ḳhizāñ ne luuTā

mirī pā-e-justujū ko mirī ḳhū-e-ārzū ko

mire rāste meñ aa kar na.e imtihāñ ne luuTā

na milā sukūn āḳhir jo jahān-e-rang-o-bū meñ

na mujhe kisī ne jaanā mujhe hai jahāñ ne luuTā

nahīñ hai gila kisī se na 'adā' koī shikāyat

mujhe zabt-e-ġham ne rokā ġham-e-nā-gahāñ ne luuTā

kabhi meri har KHushi ko mere mehrban ne luTa

kabhi meri anjuman ko mere pasban ne luTa

kabhi bijliyan taDap ke girin mere aashiyan par

jo bache the chaar tinke unhen raaz-dan ne luTa

the bacha bacha ke rakhe kuchh gul rah-e-chaman se

mujhe Dal kar qafas mein unhen baghban ne luTa

jo bahaar ban ke aae wo ghubar ban ke bhaTke

kabhi to saba ne chheDa kabhi hai KHizan ne luTa

meri pa-e-justuju ko meri KHu-e-arzu ko

mere raste mein aa kar nae imtihan ne luTa

na mila sukun aaKHir jo jahan-e-rang-o-bu mein

na mujhe kisi ne jaana mujhe hai jahan ne luTa

nahin hai gila kisi se na 'ada' koi shikayat

mujhe zabt-e-gham ne roka gham-e-na-gahan ne luTa