kabhi miT kar na fana hasrat-o-arman honge

kabhī miT kar na fanā hasrat-o-armāñ hoñge

ban ke dāġh-e-dil-e-māyūs numāyāñ hoñge

dāġh-hā-e-dil-e-sozāñ ko maiñ rakhtā huuñ aziiz

yahī ik roz ayāġh-e-mai-e-irfāñ hoñge

merī ulfat ne baḌhāyā hai tirā husn-o-jamāl

mah-jabīñ ab tujhe dekheñge to hairāñ hoñge

sāya-e-zulf-e-pareshāñ jo samajhte haiñ tujhe

vo tire shukr-guzār ai shab-e-hijrāñ hoñge

shikva-e-jor par ai dost na ho sharminda

tū jo pachhtā.egā ham aur pashemāñ hoñge

raas aa.egā unhīñ ko ye junūn-e-ulfat

jo gul-e-tar kī tarah chāk-garebāñ hoñge

dekh kar shaiḳh-o-barahman kī adāvat yā-rab

sochtā huuñ kabhī insān bhī insāñ hoñge

do bahāroñ ko na dāvat ki asīrān-e-qafas

āmad-e-fasl-e-bahārī se pareshāñ hoñge

kabhi miT kar na fana hasrat-o-arman honge

ban ke dagh-e-dil-e-mayus numayan honge

dagh-ha-e-dil-e-sozan ko main rakhta hun aziz

yahi ek roz ayagh-e-mai-e-irfan honge

meri ulfat ne baDhaya hai tera husn-o-jamal

mah-jabin ab tujhe dekhenge to hairan honge

saya-e-zulf-e-pareshan jo samajhte hain tujhe

wo tere shukr-guzar ai shab-e-hijran honge

shikwa-e-jor par ai dost na ho sharminda

tu jo pachhtaega hum aur pasheman honge

ras aaega unhin ko ye junun-e-ulfat

jo gul-e-tar ki tarah chaak-gareban honge

dekh kar shaiKH-o-barahman ki adawat ya-rab

sochta hun kabhi insan bhi insan honge

do bahaaron ko na dawat ki asiran-e-qafas

aamad-e-fasl-e-bahaari se pareshan honge