kabhi na manzil ko pa sakega wo jis mein azm-e-jawan nahin hai

kabhī na manzil ko pā sakegā vo jis meñ azm-e-javāñ nahīñ hai

husūl-e-maqsad meñ ho jo koshish to vo kabhī rā.egāñ nahīñ hai

haiñ kasb-e-zar meñ sabhī pareshāñ isī ko samjhe haiñ dīn-o-īmāñ

magar samajhte nahīñ ye nādāñ ki zindagī jāvedāñ nahīñ hai

ajiib bū hai ajiib rangat na dilkashī hai na koī nik.hat

ye gul-kada koī aur hogā mirā hasīñ gulsitāñ nahīñ hai

maiñ dekhtā huuñ ki jaur-e-gulchīñ pe ro rahī haiñ tamām shāḳheñ

yahī sabab hai ki sehn-e-gul meñ kahīñ mirā āshiyāñ nahīñ hai

mire hī aañsū chamak rahe haiñ ba-shakl-e-anjum bulandiyoñ par

ki bazm-e-gītī meñ koī 'shabnam' kā mūnis-o-mehrbāñ nahīñ hai

kabhi na manzil ko pa sakega wo jis mein azm-e-jawan nahin hai

husul-e-maqsad mein ho jo koshish to wo kabhi raegan nahin hai

hain kasb-e-zar mein sabhi pareshan isi ko samjhe hain din-o-iman

magar samajhte nahin ye nadan ki zindagi jawedan nahin hai

ajib bu hai ajib rangat na dilkashi hai na koi nikhat

ye gul-kada koi aur hoga mera hasin gulsitan nahin hai

main dekhta hun ki jaur-e-gulchin pe ro rahi hain tamam shaKHen

yahi sabab hai ki sehn-e-gul mein kahin mera aashiyan nahin hai

mere hi aansu chamak rahe hain ba-shakl-e-anjum bulandiyon par

ki bazm-e-giti mein koi 'shabnam' ka munis-o-mehrban nahin hai