kabhi na mere qalam ki giraft mein aae

kabhī na mere qalam kī giraft meñ aa.e

ye bhāgte hue lamhe ye dauḌte saa.e

vo zor ab mire sūkhe hue badan meñ kahāñ

muhāl hai mirī āvāz duur tak jaa.e

zamīn-e-sher meñ jab quvvat-e-numū hī nahīñ

hazār sīñchiye sabza bhī kyā nazar aa.e

yahāñ to maslahatan jhuuT ko bhī sach kahiye

ham aisī maslahat-e-nāravā se baaz aa.e

ham aise ahl-e-nazar ke liye farishta hai

vo aadmī jo kisī aadmī ke kaam aa.e

ab aane vaale na.e saal par nazar rakkho

chaman meñ phuul khilā.e ki aag barsā.e

'asar' ġhayūr agar hai to kaise mumkin hai

kisī ke sāmne dast-e-savāl phailā.e

kabhi na mere qalam ki giraft mein aae

ye bhagte hue lamhe ye dauDte sae

wo zor ab mere sukhe hue badan mein kahan

muhaal hai meri aawaz dur tak jae

zamin-e-sher mein jab quwwat-e-numu hi nahin

hazar sinchiye sabza bhi kya nazar aae

yahan to maslahatan jhuT ko bhi sach kahiye

hum aisi maslahat-e-narawa se baz aae

hum aise ahl-e-nazar ke liye farishta hai

wo aadmi jo kisi aadmi ke kaam aae

ab aane wale nae sal par nazar rakkho

chaman mein phul khilae ki aag barsae

'asar' ghayur agar hai to kaise mumkin hai

kisi ke samne dast-e-sawal phailae