kabhi na pahunchega nuqsan ishq ke hathon

kabhī na pahuñchegā nuqsān ishq ke hāthoñ

milegā dard kā darmān ishq ke hāthoñ

kisī ke chāk-e-garebāñ kā ye rafūgar hai

hai koī chāk-garebān ishq ke hāthoñ

gavāhī surḳhī-e-ḳhūn-e-shahīd detī hai

huā hai surḳh-rū insān ishq ke hāthoñ

havas ne aag lagā.ī hai gulsitānoñ meñ

banī hai aag gulistān ishq ke hāthoñ

ba-dast-e-aql-o-ḳhirad ye sañvar na pā.egī

sañvāro zulf-e-pareshān ishq ke hāthoñ

havas ke hāthoñ ba-juz iztirāb kuchh na milā

milā sukūn kā sāmān ishq ke hāthoñ

shikast-e-fāsh se do-chār ho rahī hai havas

abhī talak sar-e-maidān ishq ke hāthoñ

banā hai markaz-e-ushshāq-o-rashk-e-bāġh-e-bahisht

ye karbalā kā bayābān ishq ke hāthoñ

havas ke hāthoñ jo badnām hone vaalā thā

vo 'nūrī' ho gayā zīshān ishq ke hāthoñ

kabhi na pahunchega nuqsan ishq ke hathon

milega dard ka darman ishq ke hathon

kisi ke chaak-e-gareban ka ye rafugar hai

hai koi chaak-gareban ishq ke hathon

gawahi surKHi-e-KHun-e-shahid deti hai

hua hai surKH-ru insan ishq ke hathon

hawas ne aag lagai hai gulsitanon mein

bani hai aag gulistan ishq ke hathon

ba-dast-e-aql-o-KHirad ye sanwar na paegi

sanwaro zulf-e-pareshan ishq ke hathon

hawas ke hathon ba-juz iztirab kuchh na mila

mila sukun ka saman ishq ke hathon

shikast-e-fash se do-chaar ho rahi hai hawas

abhi talak sar-e-maidan ishq ke hathon

bana hai markaz-e-ushshaq-o-rashk-e-bagh-e-bahisht

ye karbala ka bayaban ishq ke hathon

hawas ke hathon jo badnam hone wala tha

wo 'nuri' ho gaya zishan ishq ke hathon