kabhi nafrat ka qissa muKHtasar hone nahin deta

kabhī nafrat kā qissa muḳhtasar hone nahīñ detā

kisī sūrat vo ham ko mo'atabar hone nahīñ detā

zarā us kā karishma dekh koī inqalāb aa.e

nizām-e-kohna ko zer-o-zabar hone nahīñ detā

zarā Tahnī baḌhī aur bāġhbāñ ne kaaT kar pheñkī

use paudā hī rakhtā hai shajar hone nahīñ detā

jo mil baiThe to phir sayyād kī kuchh chal na pā.egī

anādil ko vo yuuñ shīr-o-shakar hone nahīñ detā

hamāre qāfile ke har musāfir meñ ye ḳhūbī hai

kisī ko bhī vo apnā rāhbar hone nahīñ detā

samajh baiThā use tiryāq jis ko zahr kahtā thā

tujhe to aa.ina bhī shīshagar hone nahīñ detā

ayaañ ho jā.egā is tarah se rang-e-bahār 'az.har'

lahū se is liye chehra vo tar hone nahīñ detā

kabhi nafrat ka qissa muKHtasar hone nahin deta

kisi surat wo hum ko mo'atabar hone nahin deta

zara us ka karishma dekh koi inqalab aae

nizam-e-kohna ko zer-o-zabar hone nahin deta

zara Tahni baDhi aur baghban ne kaT kar phenki

use pauda hi rakhta hai shajar hone nahin deta

jo mil baiThe to phir sayyaad ki kuchh chal na paegi

anadil ko wo yun shir-o-shakar hone nahin deta

hamare qafile ke har musafir mein ye KHubi hai

kisi ko bhi wo apna rahbar hone nahin deta

samajh baiTha use tiryaq jis ko zahr kahta tha

tujhe to aaina bhi shishagar hone nahin deta

ayan ho jaega is tarah se rang-e-bahaar 'azhar'

lahu se is liye chehra wo tar hone nahin deta