kabhi qalaq mein kabhi fikr-o-intizar mein hain

kabhī qalaq meñ kabhī fikr-o-intizār meñ haiñ

hazār tarah ke sadme firāq-e-yār meñ haiñ

vo sun ke qissa-e-ġham hañste hañste loT gayā

ye shoḳhiyāñ bhī na.ī shoḳh-e-gul-ezār meñ haiñ

maiñ kyā bayān karūñ aage tere ai 'zāhid'

ajiib kaifiyateñ nashsha ke ḳhumār meñ haiñ

jahāñ meñ ham ne uThā.e the ranj kyā kyā kuchh

fanā ke baad baḌe chain se mazār meñ haiñ

vo ham ko qatl kareñ chāheñ TukḌe TukḌe kareñ

ham un ke bas meñ haiñ ham un ke iḳhtiyār meñ haiñ

ḳhudā kare ki na aa.eñ vo fātiha paḌhne

ki tiin din abhī bhārī mujhe mazār meñ haiñ

nasīhat aap to karte haiñ hazrat-e-nāseh

maiñ jāntā hī nahīñ aap kis shumār meñ haiñ

payāmbar ye bhī kahnā hamārī jānib se

tumhārī yaad meñ haiñ aur intizār meñ haiñ

ḳhudā ke fazl se kaTtī hai lutf se ai 'ranj'

baḌe maze meñ haiñ ham bhī baḌī bahār meñ haiñ

kabhi qalaq mein kabhi fikr-o-intizar mein hain

hazar tarah ke sadme firaq-e-yar mein hain

wo sun ke qissa-e-gham hanste hanste loT gaya

ye shoKHiyan bhi nai shoKH-e-gul-ezar mein hain

main kya bayan karun aage tere ai 'zahid'

ajib kaifiyaten nashsha ke KHumar mein hain

jahan mein hum ne uThae the ranj kya kya kuchh

fana ke baad baDe chain se mazar mein hain

wo hum ko qatl karen chahen TukDe TukDe karen

hum un ke bas mein hain hum un ke iKHtiyar mein hain

KHuda kare ki na aaen wo fatiha paDhne

ki tin din abhi bhaari mujhe mazar mein hain

nasihat aap to karte hain hazrat-e-naseh

main jaanta hi nahin aap kis shumar mein hain

payambar ye bhi kahna hamari jaanib se

tumhaari yaad mein hain aur intizar mein hain

KHuda ke fazl se kaTti hai lutf se ai 'ranj'

baDe maze mein hain hum bhi baDi bahaar mein hain