kabhi qarib kabhi dur se guzarte hue

kabhī qarīb kabhī duur se guzarte hue

azaab dete haiñ kuchh log mere barte hue

qarīb paanī ke jaanā nahīñ kisī sūrat

vasiyyat aag ne kī thī sharar ko marte hue

banā hai jab se mirā jism hairatoñ kā maqām

maiñ dekhtā huuñ jahāñ meñ sabhī ko Darte hue

yatīm lagne lagā ishq merā mujh ko ḳhud

maiñ ro paḌā huuñ nazar se tirī utarte hue

huā hai ranj mujhe raat kī nahūsat kā

ki ḳhvāb duur hue TuuT kar bikharte hue

hamārī āñkhoñ pe ḳhālī nigāh rakhtā hai

vo aa.ine ko nahīñ dekhtā sañvarte hue

ḳhayāl yūñhī hai ik guzrā be-ma.ānī sā

dil-o-dimāġh mirā be-qarār karte hue

vahī hai ishq purānā ise nayā na kaho

jhijhak rahe haiñ jahāñ log paañv dharte hue

vo mere TuuTe marāsim kā naqsh-e-āḳhir thā

ki tham ga.e haiñ mire haath rang bharte hue

kabhi qarib kabhi dur se guzarte hue

azab dete hain kuchh log mere barte hue

qarib pani ke jaana nahin kisi surat

wasiyyat aag ne ki thi sharar ko marte hue

bana hai jab se mera jism hairaton ka maqam

main dekhta hun jahan mein sabhi ko Darte hue

yatim lagne laga ishq mera mujh ko KHud

main ro paDa hun nazar se teri utarte hue

hua hai ranj mujhe raat ki nahusat ka

ki KHwab dur hue TuT kar bikharte hue

hamari aankhon pe KHali nigah rakhta hai

wo aaine ko nahin dekhta sanwarte hue

KHayal yunhi hai ek guzra be-maani sa

dil-o-dimagh mera be-qarar karte hue

wahi hai ishq purana ise naya na kaho

jhijhak rahe hain jahan log panw dharte hue

wo mere TuTe marasim ka naqsh-e-aKHir tha

ki tham gae hain mere hath rang bharte hue