kabhi sanam to kabhi wo KHuda tha aankhon mein

kabhī sanam to kabhī vo ḳhudā thā āñkhoñ meñ

khulī jo aañkh to manzar judā thā āñkhoñ meñ

bikhar rahe the zamān-o-makāñ meñ sar kitne

ki pichhlī raat ajab ran paḌā thā āñkhoñ meñ

usī se aa.ī thī kaun-o-makāñ kī āvāzeñ

vo ek dar jo sahar tak khulā thā āñkhoñ meñ

guzar gayā vo mire dil se sar jhukā.e hue

phir us ke baa'd añdherā baḌā thā āñkhoñ meñ

ajiib rang se us ne dikhāyā rang-e-bahār

chaman chaman thā magar gul khilā thā āñkhoñ meñ

abhī kiyā thā hisār-e-ḳhayāl ke bāhar

zarā sī der meñ vo phir khaḌā thā āñkhoñ meñ

hujūm-e-sā.at-e-ḳhālī na āsmāñ na zamīñ

darūn-e-zāt kā vo sāneha thā āñkhoñ meñ

tilism-e-saut-o-sadā aur nigār-ḳhāna-e-rang

har ek aan meñ manzar nayā thā āñkhoñ meñ

bas is tarah se badan kā safar tamām huā

nazar thī jānib-e-sāġhar ḳhudā thā āñkhoñ meñ

usī ne mere taġhazzul ko paash paash kiyā

vo aadmī jo barahna khaḌā thā āñkhoñ meñ

na maiñ thā aur na tum the na tīsrā koī

badan ke paar badan dūsrā thā āñkhoñ meñ

vo jalva-rez suḳhan-dar-suḳhan thā mere liye

vo husn-e-ḳhvāb sadā-dar-sadā thā āñkhoñ meñ

ab us ke qurb kā 'ajmal' hisāb kyā rakhtā

tamām shab kā ajab silsila thā āñkhoñ meñ

kabhi sanam to kabhi wo KHuda tha aankhon mein

khuli jo aankh to manzar juda tha aankhon mein

bikhar rahe the zaman-o-makan mein sar kitne

ki pichhli raat ajab ran paDa tha aankhon mein

usi se aai thi kaun-o-makan ki aawazen

wo ek dar jo sahar tak khula tha aankhon mein

guzar gaya wo mere dil se sar jhukae hue

phir us ke ba'd andhera baDa tha aankhon mein

ajib rang se us ne dikhaya rang-e-bahaar

chaman chaman tha magar gul khila tha aankhon mein

abhi kiya tha hisar-e-KHayal ke bahar

zara si der mein wo phir khaDa tha aankhon mein

hujum-e-saat-e-KHali na aasman na zamin

darun-e-zat ka wo saneha tha aankhon mein

tilism-e-saut-o-sada aur nigar-KHana-e-rang

har ek aan mein manzar naya tha aankhon mein

bas is tarah se badan ka safar tamam hua

nazar thi jaanib-e-saghar KHuda tha aankhon mein

usi ne mere taghazzul ko pash pash kiya

wo aadmi jo barahna khaDa tha aankhon mein

na main tha aur na tum the na tisra koi

badan ke par badan dusra tha aankhon mein

wo jalwa-rez suKHan-dar-suKHan tha mere liye

wo husn-e-KHwab sada-dar-sada tha aankhon mein

ab us ke qurb ka 'ajmal' hisab kya rakhta

tamam shab ka ajab silsila tha aankhon mein