kabhi soz-e-dil ka gila kiya kabhi lab se shor-e-fughan uTha

kabhī soz-e-dil kā gila kiyā kabhī lab se shor-e-fuġhāñ uThā

koī ahl-e-zabt bhalā buto use kyā kare jo dhuāñ uThā

ye ḳhudā kī shaan to dekhiye ki ḳhudā kā naam hī rah gayā

mujhe taaza yād-e-butāñ huī jo haram se shor-e-azāñ uThā

mire sabr ne bhī ġhazab kiyā ki adū kī jaan pe ban ga.ī

ye kahāñ kī choT kahāñ lagī ye kahāñ kā dard kahāñ uThā

jo kabhī lagī kī ḳhabar sunī to ġhazab kī choT yahāñ lagī

mujhe soz-e-dil kā gumāñ huā jo kisī ke ghar se dhuāñ uThā

na huā ilāj-e-ġham-e-ḳhudī kisī barahman se na shaiḳh se

mujhe is balā se bachāne ko jo uThā to pīr-e-muġhāñ uThā

ye jahān dām-e-fareb hai jo chale to dekh ke chal zarā

jo tujhe ḳhayāl ho diid kā to samajh ke aañkh yahāñ uThā

tirī rāh-e-shauq meñ zo.af se kahūñ hāl-e-'nātiq'-e-zār kyā

ye vahīñ uThā hai jahāñ girā ye vahīñ girā hai jahāñ uThā

kabhi soz-e-dil ka gila kiya kabhi lab se shor-e-fughan uTha

koi ahl-e-zabt bhala buto use kya kare jo dhuan uTha

ye KHuda ki shan to dekhiye ki KHuda ka nam hi rah gaya

mujhe taza yaad-e-butan hui jo haram se shor-e-azan uTha

mere sabr ne bhi ghazab kiya ki adu ki jaan pe ban gai

ye kahan ki choT kahan lagi ye kahan ka dard kahan uTha

jo kabhi lagi ki KHabar suni to ghazab ki choT yahan lagi

mujhe soz-e-dil ka guman hua jo kisi ke ghar se dhuan uTha

na hua ilaj-e-gham-e-KHudi kisi barahman se na shaiKH se

mujhe is bala se bachane ko jo uTha to pir-e-mughan uTha

ye jahan dam-e-fareb hai jo chale to dekh ke chal zara

jo tujhe KHayal ho did ka to samajh ke aankh yahan uTha

teri rah-e-shauq mein zoaf se kahun haal-e-'natiq'-e-zar kya

ye wahin uTha hai jahan gira ye wahin gira hai jahan uTha