kabhi sukun to kabhi iztirab bhi jhela

kabhī sukūñ to kabhī iztirāb bhī jhelā

khulī jo aañkh to anjām-e-ḳhvāb bhī jhelā

qadam qadam pe purāne sabaq bhī yaad aa.e

qadam qadam pe badaltā nisāb bhī jhelā

bayāz-e-dil ke sunahre hurūf bhī chūme

kitāb-e-jāñ pe likhā intisāb bhī jhelā

hamārā haq bhī musallam thā qatre qatre par

hamīñ ne tishna-labī kā azaab bhī jhelā

kabhī jo ā.īna-ḳhāne kī sair ko nikle

to ek manzar-e-ḳhud ehtisāb bhī jhelā

chale to saare zamāne ko saath le ke chale

ruke to ālam-e-ḳhud-ijtināb bhī jhelā

na jaane kis kī rahī justujū 'ziyā' ham ko

ki ham ne ik dil-e-ḳhāna-ḳharāb bhī jhelā

kabhi sukun to kabhi iztirab bhi jhela

khuli jo aankh to anjam-e-KHwab bhi jhela

qadam qadam pe purane sabaq bhi yaad aae

qadam qadam pe badalta nisab bhi jhela

bayaz-e-dil ke sunahre huruf bhi chume

kitab-e-jaan pe likha intisab bhi jhela

hamara haq bhi musallam tha qatre qatre par

hamin ne tishna-labi ka azab bhi jhela

kabhi jo aaina-KHane ki sair ko nikle

to ek manzar-e-KHud ehtisab bhi jhela

chale to sare zamane ko sath le ke chale

ruke to aalam-e-KHud-ijtinab bhi jhela

na jaane kis ki rahi justuju 'ziya' hum ko

ki hum ne ek dil-e-KHana-KHarab bhi jhela