kabhi surKHi se likhta hun kabhi kajal se likhta hun

kabhī surḳhī se likhtā huuñ kabhī kājal se likhtā huuñ

maiñ dil kī baat jazboñ kī harī koñpal se likhtā huuñ

maiñ terā naam jab likhtā huuñ apne dil kī taḳhtī par

gulāb-o-mushk se zamzam se gañgā-jal se likhtā huuñ

bujhā kar zahr se rakkhe haiñ yāroñ ne qalam apne

magar maiñ to vahī kevḌe se aur sandal se likhtā huuñ

ḳhushī kī dāstāñ banjar zamīnoñ kī hathelī par

gulābī nuur barsāte hue bādal se likhtā huuñ

'salīm' aatī hai jab sachchā.ī likhne kī mirī baarī

fasīl-e-shahr par jaltī huī mash.al se likhtā huuñ

kabhi surKHi se likhta hun kabhi kajal se likhta hun

main dil ki baat jazbon ki hari konpal se likhta hun

main tera nam jab likhta hun apne dil ki taKHti par

gulab-o-mushk se zamzam se ganga-jal se likhta hun

bujha kar zahr se rakkhe hain yaron ne qalam apne

magar main to wahi kewDe se aur sandal se likhta hun

KHushi ki dastan banjar zaminon ki hatheli par

gulabi nur barsate hue baadal se likhta hun

'salim' aati hai jab sachchai likhne ki meri bari

fasil-e-shahr par jalti hui mashal se likhta hun