kabhi tasawwur mein aa rahi ho kabhi taKHayyul pe chha rahi ho

kabhī tasavvur meñ aa rahī ho kabhī taḳhayyul pe chhā rahī ho

mire shabistān-e-ārzū ko nigār-ḳhāna banā rahī ho

rah-e-vafā meñ qadam qadam par na.ī na.ī shart lā rahī ho

ye kis ne bahkā diyā hai tum ko ye kyā shagūfe khilā rahī ho

ye ḳhud-parastī-e-nāravā hai ye bevafā.ī kī intihā hai

tumhārī ḳhātir jo luT chukā hai usī se āñkheñ churā rahī ho

bigāḌ meñ ik banāv sā hai lagāvaToñ meñ khichāo sā hai

diyā umīdoñ kā mere dil meñ jalā rahī ho bujhā rahī ho

fazā bhī nā-sāz hai jahāñ kī vahāñ vafā saañs legī kyūñkar

havā bhī ġhammāz hai jahāñ kī vahāñ mujhe kyoñ bulā rahī ho

agarche sahrā-e-zindagī meñ koī mirā ham-safar nahīñ hai

magar ye mahsūs ho rahā hai ki tum mire saath aa rahī ho

phir aaj yaad un kī aa rahī hai magar is andāz se ki 'ehsāñ'

urūs-e-nau jaise pahlī shab meñ badan ko apne churā rahī ho

kabhi tasawwur mein aa rahi ho kabhi taKHayyul pe chha rahi ho

mere shabistan-e-arzu ko nigar-KHana bana rahi ho

rah-e-wafa mein qadam qadam par nai nai shart la rahi ho

ye kis ne bahka diya hai tum ko ye kya shagufe khila rahi ho

ye KHud-parasti-e-narawa hai ye bewafai ki intiha hai

tumhaari KHatir jo luT chuka hai usi se aankhen chura rahi ho

bigaD mein ek banaw sa hai lagawaTon mein khichao sa hai

diya umidon ka mere dil mein jala rahi ho bujha rahi ho

faza bhi na-saz hai jahan ki wahan wafa sans legi kyunkar

hawa bhi ghammaz hai jahan ki wahan mujhe kyon bula rahi ho

agarche sahra-e-zindagi mein koi mera ham-safar nahin hai

magar ye mahsus ho raha hai ki tum mere sath aa rahi ho

phir aaj yaad un ki aa rahi hai magar is andaz se ki 'ehsan'

urus-e-nau jaise pahli shab mein badan ko apne chura rahi ho