kabhi taskin kabhi aazar bhi hai

kabhī taskīñ kabhī āzār bhī hai

mohabbat phuul bhī hai ḳhaar bhī hai

pighal jaatī hai misl-e-sham.a lekin

mohabbat āhanī dīvār bhī hai

tire hoñToñ pe hai inkār lekin

tirī āñkhoñ meñ kuchh iqrār bhī hai

ba-zāhir haiñ sabhī ġham-ḳhvār lekin

haqīqat meñ koī ġham-ḳhvār bhī hai

kabhī un kī nazar hai vaj.h-e-taskīñ

kabhī chaltī huī talvār bhī hai

na jā is par ki maiñ chup huuñ sitam par

ye ḳhāmoshī lab-e-guftār bhī hai

zamāna tanz-farmā bhī hai lekin

ulajhnā ishq se be-kār bhī hai

faqat guftār par nāzāñ hai 'āsī'

ḳhayāl-e-ḳhūbī-e-kirdār bhī hai

kabhi taskin kabhi aazar bhi hai

mohabbat phul bhi hai KHar bhi hai

pighal jati hai misl-e-shama lekin

mohabbat aahani diwar bhi hai

tere honTon pe hai inkar lekin

teri aankhon mein kuchh iqrar bhi hai

ba-zahir hain sabhi gham-KHwar lekin

haqiqat mein koi gham-KHwar bhi hai

kabhi un ki nazar hai wajh-e-taskin

kabhi chalti hui talwar bhi hai

na ja is par ki main chup hun sitam par

ye KHamoshi lab-e-guftar bhi hai

zamana tanz-farma bhi hai lekin

ulajhna ishq se be-kar bhi hai

faqat guftar par nazan hai 'asi'

KHayal-e-KHubi-e-kirdar bhi hai