kabhi to aate wo baala-e-baam kah dena

kabhī to aate vo bālā-e-bām kah denā

kabhī to ham se bhī karte kalām kah denā

zamāna-sāzoñ se allāh bas bachā.e mujhe

ġhazab huā mirā itnā kalām kah denā

ye koī baat hai hañs hañs ke tanz se zālim

jo muñh meñ aa.e mujhe be-lagām kah denā

mazā to jab hai ki chupke se bhī na pī vaa.iz

hameñ bhī aatā hai jhaT se harām kah denā

lagā.e aas huuñ kab se maiñ nāma-bar ke liye

mile jo raah meñ merā salām kah denā

sabā karam ho ye 'dīvān' par ḳhudā ke liye

na kuchh sahī to faqat ik salām kah denā

kabhi to aate wo baala-e-baam kah dena

kabhi to hum se bhi karte kalam kah dena

zamana-sazon se allah bas bachae mujhe

ghazab hua mera itna kalam kah dena

ye koi baat hai hans hans ke tanz se zalim

jo munh mein aae mujhe be-lagam kah dena

maza to jab hai ki chupke se bhi na pi waiz

hamein bhi aata hai jhaT se haram kah dena

lagae aas hun kab se main nama-bar ke liye

mile jo rah mein mera salam kah dena

saba karam ho ye 'diwan' par KHuda ke liye

na kuchh sahi to faqat ek salam kah dena