kabhi to dekh dard-e-dil kisi ka

kabhī to dekh dard-e-dil kisī kā

kabhī to haal sun ġhāfil kisī kā

sabā kar de mirī hājat-ravā.ī

uThā de parda-e-mahmil kisī kā

rahe nākām sab ai hazrat-e-ishq

huā kab mudda.ā hāsil kisī kā

shakeb-o-sabr phir jaatā rahā hai

huā hai phir ye dil maa.il kisī kā

kamar bāñdhī hai bedād-o-sitam par

tujhe kab paas hai qātil kisī kā

zamāna kyā burā aaya hai yā-rab

kisī ke haath meñ hai dil kisī kā

adā-o-nāz-o-shoḳhī se shab-e-vasl

bigaḌnā yaad hai ai dil kisī kā

tamāshā dekh lo tum bhī to aa kar

taḌaptā hai dil-e-bismil kisī kā

bañdhā rahtā hai terā hī tasavvur

bahaltā hai isī meñ dil kisī kā

pahuñch jaatā hai vo manzil ko ai 'lutf'

agar ustād ho kāmil kisī kā

kabhi to dekh dard-e-dil kisi ka

kabhi to haal sun ghafil kisi ka

saba kar de meri hajat-rawai

uTha de parda-e-mahmil kisi ka

rahe nakaam sab ai hazrat-e-ishq

hua kab muddaa hasil kisi ka

shakeb-o-sabr phir jata raha hai

hua hai phir ye dil mail kisi ka

kamar bandhi hai bedad-o-sitam par

tujhe kab pas hai qatil kisi ka

zamana kya bura aaya hai ya-rab

kisi ke hath mein hai dil kisi ka

ada-o-naz-o-shoKHi se shab-e-wasl

bigaDna yaad hai ai dil kisi ka

tamasha dekh lo tum bhi to aa kar

taDapta hai dil-e-bismil kisi ka

bandha rahta hai tera hi tasawwur

bahalta hai isi mein dil kisi ka

pahunch jata hai wo manzil ko ai 'lutf'

agar ustad ho kaamil kisi ka