kabhi wafur-e-tamanna kabhi malamat ne

kabhī vafūr-e-tamannā kabhī malāmat ne

thakā diyā hai badan roz kī ḳhajālat ne

maiñ zaḳhm zaḳhm thā bistar kī silvaToñ meñ ghirā

mirā jo haal kiyā sub.h kī malāhat ne

fazā-e-jabr tujhe chaak chaak kar deñge

nigal liye jo sitāre tirī kasāfat ne

kisī jamāl kī chhab ho kisī kamāl kī zau

ujaaḌ Daalā hai pazhmurdagī kī aadat ne

ham aise kaun se ġharq-e-nashāt-o-aish the jo

hameñ hī taak liyā ḳhauf kī risālat ne

ġhurūr hī kā na bahrūp ho 'husain-ābid'

jo ijz tujh ko diyā hai tirī ibādat ne

kabhi wafur-e-tamanna kabhi malamat ne

thaka diya hai badan roz ki KHajalat ne

main zaKHm zaKHm tha bistar ki silwaTon mein ghira

mera jo haal kiya subh ki malahat ne

faza-e-jabr tujhe chaak chaak kar denge

nigal liye jo sitare teri kasafat ne

kisi jamal ki chhab ho kisi kamal ki zau

ujaD Dala hai pazhmurdagi ki aadat ne

hum aise kaun se gharq-e-nashat-o-aish the jo

hamein hi tak liya KHauf ki risalat ne

ghurur hi ka na bahrup ho 'husain-abid'

jo ijz tujh ko diya hai teri ibaadat ne