kabhi zamin kabhi aasman se guzri hai

kabhī zamīn kabhī āsmāñ se guzrī hai

mirī hayāt baḌe imtihāñ se guzrī hai

ḳhushī kī dhuup mayassar na ho sakī mujh ko

ġhamoñ kī āñdhī mirī dāstāñ se guzrī hai

batā.ūñ kyā maiñ tumheñ zindagī ke baare meñ

mirī har ek shab ashk-e-ravāñ se guzrī hai

kisī ke hijr meñ barbād dāstān-e-hayāt

ġhazal kī shakl meñ saare jahāñ se guzrī hai

tumhāre hijr meñ āñkheñ rahī haiñ nam har pal

mirī zabān bhī āh-o-fuġhāñ se guzrī hai

dhaḌakne lag gayā tezī se dil kabhī jab bhī

tumhārī yaad dil-e-āshiyāñ se guzrī hai

har ek samt se aatī hai pyaar kī ḳhushbū

zabān 'mīr' kī shāyad yahāñ se guzrī hai

har ek phuul ko murjhā ga.ī 'alī-afzal'

na jaane kaisī havā gulsitāñ se guzrī hai

nabī ke diin kī 'azmat ke vāste 'afzal'

tamām nasl-e-alī imtihāñ se guzrī hai

kabhi zamin kabhi aasman se guzri hai

meri hayat baDe imtihan se guzri hai

KHushi ki dhup mayassar na ho saki mujh ko

ghamon ki aandhi meri dastan se guzri hai

bataun kya main tumhein zindagi ke bare mein

meri har ek shab ashk-e-rawan se guzri hai

kisi ke hijr mein barbaad dastan-e-hayat

ghazal ki shakl mein sare jahan se guzri hai

tumhaare hijr mein aankhen rahi hain nam har pal

meri zaban bhi aah-o-fughan se guzri hai

dhaDakne lag gaya tezi se dil kabhi jab bhi

tumhaari yaad dil-e-ashiyan se guzri hai

har ek samt se aati hai pyar ki KHushbu

zaban 'mir' ki shayad yahan se guzri hai

har ek phul ko murjha gai 'ali-afzal'

na jaane kaisi hawa gulsitan se guzri hai

nabi ke din ki 'azmat ke waste 'afzal'

tamam nasl-e-ali imtihan se guzri hai