kabhi zamin kabhi aasman se laDta hai

kabhī zamīn kabhī āsmāñ se laḌtā hai

ajiib shaḳhs hai saare jahāñ se laḌtā hai

kisī ke ishq kī mannat kā tel hai us meñ

isī liye to diyā āstāñ se laḌtā hai

hameñ ye bāñjh bahū be-nishān kar degī

ye baat kah ke vo beTe kī maañ se laḌtā hai

kirāye-dār kī niiñd is qadar pareshāñ hai

vo roz ḳhvāb meñ mālik makāñ se laḌtā hai

ye kis ke qarz kā hai bojh merī mayyat par

ye kaun hai jo mire ḳhāndāñ se laḌtā hai

duā hai ḳhair ho us ghar kī jis meñ ro ro kar

koī buzurg kisī naujavāñ se laḌtā hai

bas ek ḳhaas nishānī hai mere madfan kī

ki is makāñ meñ koī lā-makāñ se laḌtā hai

baḌe yaqīn se kuchh be-yaqīn māñgte haiñ

vo ik yaqīn jo vahm-o-gumāñ se laḌtā hai

azaan detā huuñ jab maiñ suḳhan kī masjid meñ

har ek be-navā merī azaañ se laḌtā hai

maiñ apne ahd kā 'vāsif' huuñ aur shā.ir huuñ

zamāna kis liye mujh nā-tavāñ se laḌtā hai

kabhi zamin kabhi aasman se laDta hai

ajib shaKHs hai sare jahan se laDta hai

kisi ke ishq ki mannat ka tel hai us mein

isi liye to diya aastan se laDta hai

hamein ye banjh bahu be-nishan kar degi

ye baat kah ke wo beTe ki man se laDta hai

kiraye-dar ki nind is qadar pareshan hai

wo roz KHwab mein malik makan se laDta hai

ye kis ke qarz ka hai bojh meri mayyat par

ye kaun hai jo mere KHandan se laDta hai

dua hai KHair ho us ghar ki jis mein ro ro kar

koi buzurg kisi naujawan se laDta hai

bas ek KHas nishani hai mere madfan ki

ki is makan mein koi la-makan se laDta hai

baDe yaqin se kuchh be-yaqin mangte hain

wo ek yaqin jo wahm-o-guman se laDta hai

azan deta hun jab main suKHan ki masjid mein

har ek be-nawa meri azan se laDta hai

main apne ahd ka 'wasif' hun aur shair hun

zamana kis liye mujh na-tawan se laDta hai