kabhi zamin to kabhi aasman ki zad mein hun

kabhī zamīñ to kabhī āsmāñ kī zad meñ huuñ

nafas nafas maiñ 'ajab imtihāñ kī zad meñ huuñ

ye āgahī mire haq meñ 'azāb-e-jāñ Thahrī

'ajīb dhun hai ki har dam ziyāñ kī zad meñ huuñ

na jaane kyoñ mujhe har vaqt aisā lagtā hai

maiñ munharif huuñ magar raftagāñ kī zad meñ huuñ

vo dāstāñ jo mukammal bhī hai adhūrī bhī

maiñ lamha lamha usī dāstāñ kī zad meñ huuñ

maiñ apne aap ko paane kī justujū meñ 'riyāz'

makāñ kī had se pare lā-makāñ kī zad meñ huuñ

kabhi zamin to kabhi aasman ki zad mein hun

nafas nafas main 'ajab imtihan ki zad mein hun

ye aagahi mere haq mein 'azab-e-jaan Thahri

'ajib dhun hai ki har dam ziyan ki zad mein hun

na jaane kyon mujhe har waqt aisa lagta hai

main munharif hun magar raftagan ki zad mein hun

wo dastan jo mukammal bhi hai adhuri bhi

main lamha lamha usi dastan ki zad mein hun

main apne aap ko pane ki justuju mein 'riyaz'

makan ki had se pare la-makan ki zad mein hun