kadam ki chhanw mein bansi baja raha hai koi

kadam kī chhāñv meñ bansī bajā rahā hai koī

fazā-e-burj ko be-ḳhud banā rahā hai koī

taḌap rahī thiiñ jo maujeñ vo soī jaatī haiñ

zarūr sāhil-e-jamnā pe gā rahā hai koī

sukūt-e-shām meñ gaanā hai kis qadar pur-kaif

sharāb-e-nāb ke dariyā bahā rahā hai koī

sunā thā ruuh ne jannat meñ jo lab-e-kausar

vahī tarāna-e-dilkash sunā rahā hai koī

sadā jo kaan meñ aa.ī to gopiyāñ bolīñ

uTho uTho ki hamīñ ko bulā rahā hai koī

ġhazab kā soz ḳhudāyā hai nāla-e-nai meñ

dil-o-jigar ko hamāre jalā rahā hai koī

kahīñ taḌap hai ye naġhma kahīñ sukūn-o-qarār

jagā rahā hai koī yā sulā rahā hai koī

kadam ki chhanw mein bansi baja raha hai koi

faza-e-burj ko be-KHud bana raha hai koi

taDap rahi thin jo maujen wo soi jati hain

zarur sahil-e-jamna pe ga raha hai koi

sukut-e-sham mein gana hai kis qadar pur-kaif

sharab-e-nab ke dariya baha raha hai koi

suna tha ruh ne jannat mein jo lab-e-kausar

wahi tarana-e-dilkash suna raha hai koi

sada jo kan mein aai to gopiyan bolin

uTho uTho ki hamin ko bula raha hai koi

ghazab ka soz KHudaya hai nala-e-nai mein

dil-o-jigar ko hamare jala raha hai koi

kahin taDap hai ye naghma kahin sukun-o-qarar

jaga raha hai koi ya sula raha hai koi