kah chuka hun main kai bar nahin manta main

kah chukā huuñ maiñ ka.ī baar nahīñ māntā maiñ

ai sitamgar tujhe sardār nahīñ māntā maiñ

hai agar 'ishq to khul kar kabhī iz.hār bhī kar

terī ḳhāmoshī ko iqrār nahīñ māntā maiñ

āñkhoñ meñ jazb mujhe karnī hai sūrat terī

ik jhalak ko tirā dīdār nahīñ māntā maiñ

qadr-o-qīmat mire dil kī tū samajh hī na sakā

jā tujhe achchhā ḳharīdār nahīñ māntā maiñ

tū abhī qais hai majnūñ nahīñ ban paayā hai

tujh ko lailā kā talabgār nahīñ māntā maiñ

sar ko Takrāne kī jur.at ho to dar bantā hai

kisī dīvār ko dīvār nahīñ māntā maiñ

ḳhaak bhī chāhiye sahrā meñ uḌāne ke liye

kisī bhī chiiz ko bekār nahīñ māntā maiñ

jo kabhī myaan se bāhar nahīñ aatī hai 'kamāl'

aisī talvār ko talvār nahīñ māntā maiñ

kah chuka hun main kai bar nahin manta main

ai sitamgar tujhe sardar nahin manta main

hai agar 'ishq to khul kar kabhi izhaar bhi kar

teri KHamoshi ko iqrar nahin manta main

aankhon mein jazb mujhe karni hai surat teri

ek jhalak ko tera didar nahin manta main

qadr-o-qimat mere dil ki tu samajh hi na saka

ja tujhe achchha KHaridar nahin manta main

tu abhi qais hai majnun nahin ban paya hai

tujh ko laila ka talabgar nahin manta main

sar ko Takrane ki jurat ho to dar banta hai

kisi diwar ko diwar nahin manta main

KHak bhi chahiye sahra mein uDane ke liye

kisi bhi chiz ko bekar nahin manta main

jo kabhi myan se bahar nahin aati hai 'kamal'

aisi talwar ko talwar nahin manta main