kah na saka main dil ki baat

kah na sakā maiñ dil kī baat

kaT ga.ī yūñhī saarī raat

sub.h ko āḳhir kyā hogā

bhiig chalī hai ġham kī raat

kah na sakā har ik se ġham

ye bhī hai āḳhir koī baat

dil kī kahānī kahtā chal

kaise kaTegī ġham kī raat

hone lagā hai dil bechain

aa ga.ī shāyad phir barsāt

dil kī umīdeñ ḳhatm huiiñ

āñkhoñ meñ kaaTī saarī raat

jis meñ vo hoñ mehmāñ mere

aisī bhī aa.e koī raat

dil kī kahānī band bhī kar

kaun sunegā dil kī baat

zo'm bahut thā us ko magar

khā gayā 'sāqib' ishq meñ maat

kah na saka main dil ki baat

kaT gai yunhi sari raat

subh ko aaKHir kya hoga

bhig chali hai gham ki raat

kah na saka har ek se gham

ye bhi hai aaKHir koi baat

dil ki kahani kahta chal

kaise kaTegi gham ki raat

hone laga hai dil bechain

aa gai shayad phir barsat

dil ki umiden KHatm huin

aankhon mein kaTi sari raat

jis mein wo hon mehman mere

aisi bhi aae koi raat

dil ki kahani band bhi kar

kaun sunega dil ki baat

zo'm bahut tha us ko magar

kha gaya 'saqib' ishq mein mat