kah raha tha main zamana gosh-bar-awaz tha

kah rahā thā maiñ zamāna gosh-bar-āvāz thā

dil-shikan qisse kā kitnā dil-nashīñ andāz thā

uf vo daur-husn jab har lamha jān-e-nāz thā

kam-sinī jaane pe machlī thī shabāb āġhāz thā

ruḳhsat-e-fariyād par bhī maiñ sarāpā raaz thā

girya thā be-āb yaksar naala be-āvāz thā

lan-tarānī kī sadā kā garm ik andāz thā

jis ko muusā jalva samjhe sho.ala-e-āvāz thā

husn kī roz-e-azal hangāma-ārā.ī na pūchh

raaz thā ḳhud ḳhud amīn-e-rāz ḳhud ġhammāz thā

ek ik zarra meñ jalva ek ik jalva hijāb

faash ho jaane pe bhī rāz-e-haqīqat raaz thā

haa.e vo jaatā laḌakpan haa.e vo aatā shabāb

naaz meñ ik sādgī thī sādgī meñ naaz thā

tuur par bijlī zamīñ par gul falak par chāñdnī

muskurāne kā tire har jā nayā andāz thā

uḌ ke pahuñchī rūh-e-gulshan tan qafas meñ rah gayā

qaid hone par bhī maiñ kitnā subuk-parvāz thā

tāqat-e-parvāz ra.asha ban ke ruḳhsat ho ga.ī

āzim-e-parvāz phir bhī āzim-e-parvāz thā

kah raha tha main zamana gosh-bar-awaz tha

dil-shikan qisse ka kitna dil-nashin andaz tha

uf wo daur-husn jab har lamha jaan-e-naz tha

kam-sini jaane pe machli thi shabab aaghaz tha

ruKHsat-e-fariyaad par bhi main sarapa raaz tha

girya tha be-ab yaksar nala be-awaz tha

lan-tarani ki sada ka garm ek andaz tha

jis ko musa jalwa samjhe shoala-e-awaz tha

husn ki roz-e-azal hangama-arai na puchh

raaz tha KHud KHud amin-e-raaz KHud ghammaz tha

ek ek zarra mein jalwa ek ek jalwa hijab

fash ho jaane pe bhi raaz-e-haqiqat raaz tha

hae wo jata laDakpan hae wo aata shabab

naz mein ek sadgi thi sadgi mein naz tha

tur par bijli zamin par gul falak par chandni

muskurane ka tere har ja naya andaz tha

uD ke pahunchi ruh-e-gulshan tan qafas mein rah gaya

qaid hone par bhi main kitna subuk-parwaz tha

taqat-e-parwaz rasha ban ke ruKHsat ho gai

aazim-e-parwaz phir bhi aazim-e-parwaz tha