kaha gaya na kabhi aur kabhi suna na gaya

kahā gayā na kabhī aur kabhī sunā na gayā

maiñ aisā harf huuñ jo aaj tak likhā na gayā

dabā ke hoñToñ meñ laa.ī thī mudda.ā kyā kyā

magar vo sāmne aayā to kuchh kahā na gayā

bichhaḌ ke tum se abhī tak bhaTak rahī huuñ maiñ

tumhāre ghar kī taraf koī rāsta na gayā

abhī bhī yaad hai tum ko hamāre haath kī chaa.e

ḳhudā kā shukr abhī tak vo zā.iqa na gayā

ka.ī mavāqe mirī zindagī meñ aa.e magar

kisī pe hañs liye itnā ki phir hañsā na gayā

maiñ apne chehre par āñkheñ talāsh kartī rahī

vo jab talak mujhe apnī jhalak dikhā na gayā

maiñ aate aate nishāne pe rah ga.ī 'raḳhshāñ'

ki ab ke baar bhī us kā ġhalat nishāna gayā

kaha gaya na kabhi aur kabhi suna na gaya

main aisa harf hun jo aaj tak likha na gaya

daba ke honTon mein lai thi muddaa kya kya

magar wo samne aaya to kuchh kaha na gaya

bichhaD ke tum se abhi tak bhaTak rahi hun main

tumhaare ghar ki taraf koi rasta na gaya

abhi bhi yaad hai tum ko hamare hath ki chae

KHuda ka shukr abhi tak wo zaiqa na gaya

kai mawaqe meri zindagi mein aae magar

kisi pe hans liye itna ki phir hansa na gaya

main apne chehre par aankhen talash karti rahi

wo jab talak mujhe apni jhalak dikha na gaya

main aate aate nishane pe rah gai 'raKHshan'

ki ab ke bar bhi us ka ghalat nishana gaya