kaha jo humne ki shaida-e-yar hum bhi hain

kahā jo ham ne ki shaidā-e-yār ham bhī haiñ

to dil pukār uThā jāñ-nisār ham bhī haiñ

adū to lete hī haiñ bosa aap ke ruḳh ke

balā.eñ lene ke ummīd-vār ham bhī haiñ

kahā jigar ne jo dekhī ye dil kī betābi

hameñ bhī chain nahīñ be-qarār ham bhī haiñ

vo marne par mire ro.e to hūreñ bol uTThīñ

tumhīñ nahīñ ho faqat sogvār ham bhī haiñ

ishāra karte haiñ teġh-e-nigah se tīr-e-mizha

ki terā vaar to ho dil ke paar ham bhī haiñ

vo baa'd qatl ke dete haiñ mujh ko yuuñ taskīñ

ki ḳham hai teġh kā sar sharmsār ham bhī haiñ

kahā ye ābla-e-pā ne dasht-e-ġhurbat meñ

zarā ḳhayāl rahe nok-e-ḳhār ham bhī haiñ

idhar bhī sūrat-e-zāhid koī nigāh-e-karam

ki tere bandoñ meñ parvar-digār ham bhī haiñ

kaha jo hum ne ki shaida-e-yar hum bhi hain

to dil pukar uTha jaan-nisar hum bhi hain

adu to lete hi hain bosa aap ke ruKH ke

balaen lene ke ummid-war hum bhi hain

kaha jigar ne jo dekhi ye dil ki betabi

hamein bhi chain nahin be-qarar hum bhi hain

wo marne par mere roe to huren bol uTThin

tumhin nahin ho faqat sogwar hum bhi hain

ishaara karte hain tegh-e-nigah se tir-e-mizha

ki tera war to ho dil ke par hum bhi hain

wo ba'd qatl ke dete hain mujh ko yun taskin

ki KHam hai tegh ka sar sharmsar hum bhi hain

kaha ye aabla-e-pa ne dasht-e-ghurbat mein

zara KHayal rahe nok-e-KHar hum bhi hain

idhar bhi surat-e-zahid koi nigah-e-karam

ki tere bandon mein parwar-digar hum bhi hain