kahan gai ehsas ki KHushbu fana hue jazbaat kahan

kahāñ ga.ī ehsās kī ḳhushbū fanā hue jazbāt kahāñ

ham bhī vahī haiñ tum bhī vahī ho lekin ab vo baat kahāñ

mausam ne añgḌā.ī lī to muskā.e kuchh phuul magar

man meñ dhuum machā de ab vo rañgoñ kī barsāt kahāñ

mumkin ho to khiḌkī se hī raushan kar lo ghar-āñgan

itne chāñd sitāre le kar phir aa.egī raat kahāñ

ḳhvāboñ kī tasvīroñ meñ ab aao bhar leñ rañg nayā

chāñd samundar kashtī ham tum ye jalve ik saath kahāñ

ik chehre kā aks sabhī meñ DhūñD rahā huuñ barsoñ se

lākhoñ chehre dekhe lekin us chehre sī baat kahāñ

chamak damak meñ Duub ga.e haiñ pyaar vafā ke aslī rañg

'dev' jahāñ vāloñ meñ ab vo pahle se jazbāt kahāñ

kahan gai ehsas ki KHushbu fana hue jazbaat kahan

hum bhi wahi hain tum bhi wahi ho lekin ab wo baat kahan

mausam ne angDai li to muskae kuchh phul magar

man mein dhum macha de ab wo rangon ki barsat kahan

mumkin ho to khiDki se hi raushan kar lo ghar-angan

itne chand sitare le kar phir aaegi raat kahan

KHwabon ki taswiron mein ab aao bhar len rang naya

chand samundar kashti hum tum ye jalwe ek sath kahan

ek chehre ka aks sabhi mein DhunD raha hun barson se

lakhon chehre dekhe lekin us chehre si baat kahan

chamak damak mein Dub gae hain pyar wafa ke asli rang

'dew' jahan walon mein ab wo pahle se jazbaat kahan