kahan hai apni manzil aur kise manzil samajhte hain

kahāñ hai apnī manzil aur kise manzil samajhte haiñ

na itnā hosh hai ham ko na ye ai dil samajhte haiñ

mohabbat meñ kise āsāñ kise mushkil samajhte haiñ

na itnī hai samajh ham meñ na ye ai dil samajhte haiñ

shab-e-ġham kī musībat meñ hamāre kaam aatā hai

ḳhayāl-e-yār ko ham mehrbān-e-dil samajhte haiñ

talāsh-e-yār meñ kyoñ dar-ba-dar kī ḳhaak ham chhāneñ

ham apne ḳhāna-e-dil ko tirī manzil samajhte haiñ

tumhāre husn-e-dilkash par miTe jaate haiñ dīvāne

na jaañ ko jaañ samajhte haiñ na dil ko dil samajhte haiñ

kuchh aisī raushnī hotī hai un kī shām-e-furqat meñ

ham apne dil ke dāġhoñ ko mah-e-kāmil samajhte haiñ

kahan hai apni manzil aur kise manzil samajhte hain

na itna hosh hai hum ko na ye ai dil samajhte hain

mohabbat mein kise aasan kise mushkil samajhte hain

na itni hai samajh hum mein na ye ai dil samajhte hain

shab-e-gham ki musibat mein hamare kaam aata hai

KHayal-e-yar ko hum mehrban-e-dil samajhte hain

talash-e-yar mein kyon dar-ba-dar ki KHak hum chhanen

hum apne KHana-e-dil ko teri manzil samajhte hain

tumhaare husn-e-dilkash par miTe jate hain diwane

na jaan ko jaan samajhte hain na dil ko dil samajhte hain

kuchh aisi raushni hoti hai un ki sham-e-furqat mein

hum apne dil ke daghon ko mah-e-kaamil samajhte hain