kahan hai shan-e-karimi hisab hota hai

kahāñ hai shān-e-karīmī hisāb hotā hai

gunāhgār to ab lā-javāb hotā hai

tirī janāb meñ jo bāryāb hotā hai

sukūñ nasīb use be-hisāb hotā hai

kabhī ḳhalish hai kabhī iztirāb hotā hai

ye dil kā aanā bhī jī kā azaab hotā hai

jo pūchh letā hai arbāb-e-fahm kā bhī mizāj

kitāb-e-zīst meñ aisā bhī baab hotā hai

ye ham se pūchh ise joyā-e-'aish kyā jaane

jahāñ meñ ġham bhī ḳhushī kā javāb hotā hai

dayār-e-husn meñ chashm-e-karam kaheñ jis ko

ḳhayāl-o-ḳhvāb kī duniyā kā ḳhvāb hotā hai

buto ḳhudā to ḳhud aatā hai yaad shām-e-firāq

kabhī jo had se sivā iztirāb hotā hai

shuā-e-mehr se jis ko lagī huī ho lagan

mire liye to vahī āftāb hotā hai

mire mazāq kī duniyā mujhe nahīñ miltī

mirā usuul kahāñ kāmyāb hotā hai

jinheñ ho tāb-e-nazar bahr-e-dīd aa jaa.eñ

hujūm-e-hashr hai vo be-naqāb hotā hai

usī pe ahl-e-nazar kī bhī aañkh paḌtī hai

tirī nigāh meñ jo intiḳhāb hotā hai

rahe jo ziist meñ mahv-e-malāl-e-nākāmī

vo nā-murād kahīñ kāmyāb hotā hai

har ik gunāh pe rahmat hai maujzan us kī

vahāñ karam hī gunah kā javāb hotā hai

ghamanD kis liye is par kare koī 'ḳhushtar'

ye daur-e-zīst ba-rang-e-habāb hotā hai

kahan hai shan-e-karimi hisab hota hai

gunahgar to ab la-jawab hota hai

teri janab mein jo baryab hota hai

sukun nasib use be-hisab hota hai

kabhi KHalish hai kabhi iztirab hota hai

ye dil ka aana bhi ji ka azab hota hai

jo puchh leta hai arbab-e-fahm ka bhi mizaj

kitab-e-zist mein aisa bhi bab hota hai

ye hum se puchh ise joya-e-'aish kya jaane

jahan mein gham bhi KHushi ka jawab hota hai

dayar-e-husn mein chashm-e-karam kahen jis ko

KHayal-o-KHwab ki duniya ka KHwab hota hai

buto KHuda to KHud aata hai yaad sham-e-firaq

kabhi jo had se siwa iztirab hota hai

shua-e-mehr se jis ko lagi hui ho lagan

mere liye to wahi aaftab hota hai

mere mazaq ki duniya mujhe nahin milti

mera usul kahan kaamyab hota hai

jinhen ho tab-e-nazar bahr-e-did aa jaen

hujum-e-hashr hai wo be-naqab hota hai

usi pe ahl-e-nazar ki bhi aankh paDti hai

teri nigah mein jo intiKHab hota hai

rahe jo zist mein mahw-e-malal-e-nakaami

wo na-murad kahin kaamyab hota hai

har ek gunah pe rahmat hai maujzan us ki

wahan karam hi gunah ka jawab hota hai

ghamanD kis liye is par kare koi 'KHushtar'

ye daur-e-zist ba-rang-e-habab hota hai