kahan hain phul kahan par hain Khaar jaane hai

kahāñ haiñ phuul kahāñ par haiñ ḳhaar jaane hai

chaman kā haal chaman kī bahār jaane hai

thake thake se qadam chāhe jo sulūk kareñ

hamārā zauq-e-talab kū-e-yār jaane hai

har ek shai se hai zāhir usī kī jalvagarī

nigāh-e-dair-o-haram kā vaqār jaane hai

mujhe fareb na de husn harf-e-taskīñ se

qarār kyā hai dil-e-be-qarār jaane hai

sharāb-e-nāb se matlab na tishnagī kā gila

zamāna phir bhī hameñ bāda-ḳhvār jaane hai

kisī pe aur ye zālim karam nahīñ kartā

bas ek ham ko ġham-e-rozgār jaane hai

qadam qadam hai musībat se āshnā 'shā.ir'

vatan hai kyā ye ġharīb-ud-dayār jaane hai

kahan hain phul kahan par hain KHar jaane hai

chaman ka haal chaman ki bahaar jaane hai

thake thake se qadam chahe jo suluk karen

hamara zauq-e-talab ku-e-yar jaane hai

har ek shai se hai zahir usi ki jalwagari

nigah-e-dair-o-haram ka waqar jaane hai

mujhe fareb na de husn harf-e-taskin se

qarar kya hai dil-e-be-qarar jaane hai

sharab-e-nab se matlab na tishnagi ka gila

zamana phir bhi hamein baada-KHwar jaane hai

kisi pe aur ye zalim karam nahin karta

bas ek hum ko gham-e-rozgar jaane hai

qadam qadam hai musibat se aashna 'shair'

watan hai kya ye gharib-ud-dayar jaane hai