kahan hawa ke muKhaalif hain baadban kaho

kahāñ havā ke muḳhālif haiñ bādbān kaho

kahīñ mile haiñ mohabbat ko sā.ebān kaho

na gul kaho na sitāra kaho na jaan kaho

maiñ ek lamha huuñ mujh ko faqat gumān kaho

jo sūrateñ nazar aatī haiñ ḳhvāb-e-hastī meñ

vo asl meñ kabhī hotī haiñ mehrbān kaho

maiñ munfarid to nahīñ huuñ magar tumhārā ġham

palak tak aane na duuñ mujh ko rāzdāñ kaho

vo ek shaḳhs ki jo hāsil-e-mohabbat hai

usī ko vaqt-e-suḳhan hāsil-e-bayān kaho

jo lauh-e-dil pe haiñ mahfūz chand tahrīreñ

unhī hurūf meñ ulfat kī dāstān kaho

hazār tarah to ham log āzmā.e ga.e

ab aur kaun sā rahtā hai imtihān kaho

savād-e-shām meñ shā.ir-mizāj log agar

fasurda-dil nazar aa.eñ to shādmān kaho

'nasīm' sub.h-e-tarab jab chaman meñ tum aao

guloñ kī taaza mahak ko ḳhudā kī shaan kaho

kahan hawa ke muKHalif hain baadban kaho

kahin mile hain mohabbat ko saeban kaho

na gul kaho na sitara kaho na jaan kaho

main ek lamha hun mujh ko faqat guman kaho

jo suraten nazar aati hain KHwab-e-hasti mein

wo asl mein kabhi hoti hain mehrban kaho

main munfarid to nahin hun magar tumhaara gham

palak tak aane na dun mujh ko raazdan kaho

wo ek shaKHs ki jo hasil-e-mohabbat hai

usi ko waqt-e-suKHan hasil-e-bayan kaho

jo lauh-e-dil pe hain mahfuz chand tahriren

unhi huruf mein ulfat ki dastan kaho

hazar tarah to hum log aazmae gae

ab aur kaun sa rahta hai imtihan kaho

sawad-e-sham mein shair-mizaj log agar

fasurda-dil nazar aaen to shadman kaho

'nasim' subh-e-tarab jab chaman mein tum aao

gulon ki taza mahak ko KHuda ki shan kaho