kahan-kahan tujhe DhunDun kahan duhai dun

kahāñ-kahāñ tujhe DhūñDūñ kahāñ duhā.ī duuñ

kisī kā jurm ho apnī to maiñ safā.ī duuñ

ye kusht-o-ḳhūn kā manzar nafas-nafas lekin

asīr-e-jāñ ko bhalā kis tarah rihā.ī duuñ

maiñ ik sadā huuñ to taḌpūñ tirī zabān ke biich

huuñ ik ḳhayāl to parvāz meñ dikhā.ī duuñ

kabhī to phailūñ in āñkhoñ meñ dāstāñ ban kar

kahāñ talak lab-e-ḳhāmosh se duhā.ī duuñ

badan meñ chīḳhtā phirtā huuñ tire raat ga.e

nahīñ yaqīn kī tujh ko na maiñ sunā.ī duuñ

tirī vafā ke bahut tazkire kiye ab to

ye jī meñ hai tujhe ilzām-e-bevafā.ī duuñ

tujhe shafaq meñ bharūñ chāñd chāñd chamkā.ūñ

sahar meñ duur talak rang-āzmā.ī duuñ

bas ek baar nazar aa miyān-e-sho.ala-o-shām

phir is ke baad na maiñ umr bhar dikhā.ī duuñ

kahāñ talak tere laulāk par maiñ chhāyā rahūñ

kahāñ talak tirī palkoñ pe maiñ dikhā.ī duuñ

ġhazal nahīñ na sahī marsiya likhūñ 'ajmal'

qalam hai sard ise dil kī raushnā.ī duuñ

kahan-kahan tujhe DhunDun kahan duhai dun

kisi ka jurm ho apni to main safai dun

ye kusht-o-KHun ka manzar nafas-nafas lekin

asir-e-jaan ko bhala kis tarah rihai dun

main ek sada hun to taDpun teri zaban ke bich

hun ek KHayal to parwaz mein dikhai dun

kabhi to phailun in aankhon mein dastan ban kar

kahan talak lab-e-KHamosh se duhai dun

badan mein chiKHta phirta hun tere raat gae

nahin yaqin ki tujh ko na main sunai dun

teri wafa ke bahut tazkire kiye ab to

ye ji mein hai tujhe ilzam-e-bewafai dun

tujhe shafaq mein bharun chand chand chamkaun

sahar mein dur talak rang-azmai dun

bas ek bar nazar aa miyan-e-shoala-o-sham

phir is ke baad na main umr bhar dikhai dun

kahan talak tere laulak par main chhaya rahun

kahan talak teri palkon pe main dikhai dun

ghazal nahin na sahi marsiya likhun 'ajmal'

qalam hai sard ise dil ki raushnai dun