kahan ki gunj dil-e-na-tawan mein rahti hai

kahāñ kī guuñj dil-e-nā-tavāñ meñ rahtī hai

ki thartharī sī ajab jism-o-jāñ meñ rahtī hai

qadam qadam pe vahī chashm o lab vahī gesū

tamām umr nazar imtihāñ meñ rahtī hai

maza to ye hai ki vo ḳhud to hai na.e ghar meñ

aur us kī yaad purāne makāñ meñ rahtī hai

pata to fasl-e-gul-o-lāla kā nahīñ mālūm

sunā hai qurb-o-javār-e-ḳhizāñ meñ rahtī hai

maiñ kitnā vahm karūñ lekin ik shuā-e-yaqīñ

kahīñ navāh-e-dil-e-bad-gumāñ meñ rahtī hai

hazār jaan khapātā rahūñ magar phir bhī

kamī sī kuchh mire tarz-e-bayāñ meñ rahtī hai

kahan ki gunj dil-e-na-tawan mein rahti hai

ki tharthari si ajab jism-o-jaan mein rahti hai

qadam qadam pe wahi chashm o lab wahi gesu

tamam umr nazar imtihan mein rahti hai

maza to ye hai ki wo KHud to hai nae ghar mein

aur us ki yaad purane makan mein rahti hai

pata to fasl-e-gul-o-lala ka nahin malum

suna hai qurb-o-jawar-e-KHizan mein rahti hai

main kitna wahm karun lekin ek shua-e-yaqin

kahin nawah-e-dil-e-bad-guman mein rahti hai

hazar jaan khapata rahun magar phir bhi

kami si kuchh mere tarz-e-bayan mein rahti hai