kahan le jaenge saman itna

kahāñ le jā.eñge sāmān itnā

agar aa jaa.e ham ko dhyān itnā

ye āñkheñ DhūñDhtī rahtī haiñ kis ko

ye dil rahtā hai kyuuñ hairān itnā

use koī samajh saktā hai kaise

badal jaatā ho jo har aan itnā

jo karnā thā vo maiñ ne kar liyā hai

mire jauhar meñ thā imkān itnā

use ham bhuul to sakte haiñ lekin

nahīñ ye kaam kuchh āsān itnā

kise rahnā hai duniyā meñ hamesha

kahāñ hogā koī nādān itnā

'ziyā' duniyā meñ jitnā rah chuke ham

bhalā rahte haiñ kab mehmān itnā

kahan le jaenge saman itna

agar aa jae hum ko dhyan itna

ye aankhen DhunDhti rahti hain kis ko

ye dil rahta hai kyun hairan itna

use koi samajh sakta hai kaise

badal jata ho jo har aan itna

jo karna tha wo main ne kar liya hai

mere jauhar mein tha imkan itna

use hum bhul to sakte hain lekin

nahin ye kaam kuchh aasan itna

kise rahna hai duniya mein hamesha

kahan hoga koi nadan itna

'ziya' duniya mein jitna rah chuke hum

bhala rahte hain kab mehman itna