kahan pe bichhDe the hum log kuchh pata mil jae

kahāñ pe bichhḌe the ham log kuchh pata mil jaa.e

tumhārī tarah agar koī dūsrā mil jaa.e

hazāroñ naqsh nihāñ hoñge us ke siine meñ

kabhī kabhī to ye ā.īna boltā mil jaa.e

jilau meñ le ke chaleñ saare nā-tamām se ḳhvāb

na jaane kis jagah umr-e-gurez-pā mil jaa.e

na jaane kyā kare imroz kā ye sannāTā

hamāre maazī kā ik lamha chīḳhtā mil jaa.e

shikast-o-reḳht kī duniyā meñ huuñ to ḳhvāhish hai

ḳhayāl bikhrā huā jism TūTtā mil jaa.e

maiñ nazr kar duuñ use ye lahūluhān badan

fareb-ḳhurda aqīdat kā qāfila mil jaa.e

agarche hadd-e-nazar tak dhuāñ dhuāñ hai fazā

isī dayār meñ mumkin hai phir 'sabā' mil jaa.e

kahan pe bichhDe the hum log kuchh pata mil jae

tumhaari tarah agar koi dusra mil jae

hazaron naqsh nihan honge us ke sine mein

kabhi kabhi to ye aaina bolta mil jae

jilau mein le ke chalen sare na-tamam se KHwab

na jaane kis jagah umr-e-gurez-pa mil jae

na jaane kya kare imroz ka ye sannaTa

hamare mazi ka ek lamha chiKHta mil jae

shikast-o-reKHt ki duniya mein hun to KHwahish hai

KHayal bikhra hua jism TuTta mil jae

main nazr kar dun use ye lahuluhan badan

fareb-KHurda aqidat ka qafila mil jae

agarche hadd-e-nazar tak dhuan dhuan hai faza

isi dayar mein mumkin hai phir 'saba' mil jae