kahan se bunte nae rose tane-bane hum

kahāñ se bunte na.e roz tāne-bāne ham

nayā nayā ye zamāna hai aur purāne ham

hamārī āñkhoñ pe ġhalba hai niiñd kā ab bhī

lage hue haiñ ka.ī roz se Thikāne ham

sabhī khaḌe the vahāñ apnī dāstān liye

jahāñ jahāñ ga.e qissa koī sunāne ham

chaḌhā huā hai abhī ham pe hijratoñ kā nasha

palaT ke ā.eñge ik din kisī bahāne ham

havā ke Dar se jo apne paroñ meñ simTe haiñ

unhīñ parindoñ ko aa.e haiñ ab uḌāne ham

bahut dinoñ se to apne hisār meñ gum hai

tujhe bhī ā.eñge is qaid se chhuḌāne ham

samajh meñ kuchh nahīñ aatā ki kyā huā 'naushād'

lage haiñ in dinoñ bāteñ bahut banāne ham

kahan se bunte nae roz tane-bane hum

naya naya ye zamana hai aur purane hum

hamari aankhon pe ghalba hai nind ka ab bhi

lage hue hain kai roz se Thikane hum

sabhi khaDe the wahan apni dastan liye

jahan jahan gae qissa koi sunane hum

chaDha hua hai abhi hum pe hijraton ka nasha

palaT ke aaenge ek din kisi bahane hum

hawa ke Dar se jo apne paron mein simTe hain

unhin parindon ko aae hain ab uDane hum

bahut dinon se to apne hisar mein gum hai

tujhe bhi aaenge is qaid se chhuDane hum

samajh mein kuchh nahin aata ki kya hua 'naushad'

lage hain in dinon baaten bahut banane hum