kahan siyasat-e-aghyar ne halak kiya

kahāñ siyāsat-e-aġhyār ne halāk kiyā

hameñ to apne hī afkār ne halāk kiyā

kisī kī maut kā baa.is thī ḳhāna-vīrānī

kisī ko raunaq-e-gulzār ne halāk kiyā

kisī ke vāste phūloñ kī sej mūjib-e-marg

kisī ko jāda-e-pur-ḳhār ne halāk kiyā

kisī ko sho.ala-e-ḳhurshīd ne jilā Daalā

kisī ko sāya-e-ashjār ne halāk kiyā

savād-e-shām kisī ke liye payām-e-ajal

kisī ko sub.h ke āsār ne halāk kiyā

kisī kī jaan ga.ī dekh kar tirā jalva

kisī ko hasrat-e-dīdār ne halāk kiyā

koī shikār huā apnī hichkichāhaT kā

kisī ko jur.at-e-iz.hār ne halāk kiyā

kisī kā taḳhta bichhāyā nasīb-e-ḳhufta ne

kisī ko tāla-e-bedār ne halāk kiyā

vahī halākū ki jis ne kiye hazāroñ halāk

use bhī vaqt kī yalġhār ne halāk kiyā

kisī ko maar gayā us kā kam-suḳhan honā

kisī ko kasrat-e-ash.ār ne halāk kiyā

vahī ḳhasāra hai sab kī tarah hameñ darpesh

hameñ bhī garmī-e-bāzār ne halāk kiyā

kabhī tabāh hue mashvara na milne se

kabhī navishta-e-dīvār ne halāk kiyā

milī thī jis ke laboñ se na.ī hayāt hameñ

usī kī shoḳhī-e-guftār ne halāk kiyā

ḳhudā kā shukr ki pastī na ham ko kheñch sakī

hameñ bulandī-e-me.ār ne halāk kiyā

kahan siyasat-e-aghyar ne halak kiya

hamein to apne hi afkar ne halak kiya

kisi ki maut ka bais thi KHana-virani

kisi ko raunaq-e-gulzar ne halak kiya

kisi ke waste phulon ki sej mujib-e-marg

kisi ko jada-e-pur-KHar ne halak kiya

kisi ko shoala-e-KHurshid ne jila Dala

kisi ko saya-e-ashjar ne halak kiya

sawad-e-sham kisi ke liye payam-e-ajal

kisi ko subh ke aasar ne halak kiya

kisi ki jaan gai dekh kar tera jalwa

kisi ko hasrat-e-didar ne halak kiya

koi shikar hua apni hichkichahaT ka

kisi ko jurat-e-izhaar ne halak kiya

kisi ka taKHta bichhaya nasib-e-KHufta ne

kisi ko tala-e-bedar ne halak kiya

wahi halaku ki jis ne kiye hazaron halak

use bhi waqt ki yalghaar ne halak kiya

kisi ko mar gaya us ka kam-suKHan hona

kisi ko kasrat-e-ashaar ne halak kiya

wahi KHasara hai sab ki tarah hamein darpesh

hamein bhi garmi-e-bazar ne halak kiya

kabhi tabah hue mashwara na milne se

kabhi nawishta-e-diwar ne halak kiya

mili thi jis ke labon se nai hayat hamein

usi ki shoKHi-e-guftar ne halak kiya

KHuda ka shukr ki pasti na hum ko khench saki

hamein bulandi-e-mear ne halak kiya