kahan taqat ye rusi ko kahan himmat ye german ko

kahāñ tāqat ye ruusī ko kahāñ himmat ye german ko

ki dekhe chashm-e-kaj se bhī mirī shāḳh-e-nasheman ko

vafā-dushman ye aalam ab to hai terī navāzish se

ki rahm aane lagā merī zabūñ-hālī pe dushman ko

na ab sayyād kā khaTkā na ab gulchīñ kā andesha

karam ne bāġhbāñ ke phūñk Daalā mere gulshan ko

bhalā in bijliyoñ kī sho.ala-sāmānī ko kyā kahiye

jinhoñ ne TukḌe TukḌe kar diyā ho dasht-e-aiman ko

uThā.e haiñ ye fitne nargas-e-ġhammaz ne varna

na but se shaiḳh ko zid hai na ka.abe se barahman ko

lagāvaT kā ye fan bād-e-sahar ne mujh se sīkhā hai

guloñ ko gudgudāyā aur na lipTe ḳhaar dāman ko

kahan taqat ye rusi ko kahan himmat ye german ko

ki dekhe chashm-e-kaj se bhi meri shaKH-e-nasheman ko

wafa-dushman ye aalam ab to hai teri nawazish se

ki rahm aane laga meri zabun-haali pe dushman ko

na ab sayyaad ka khaTka na ab gulchin ka andesha

karam ne baghban ke phunk Dala mere gulshan ko

bhala in bijliyon ki shoala-samani ko kya kahiye

jinhon ne TukDe TukDe kar diya ho dasht-e-aiman ko

uThae hain ye fitne nargas-e-ghammaz ne warna

na but se shaiKH ko zid hai na kabe se barahman ko

lagawaT ka ye fan baad-e-sahar ne mujh se sikha hai

gulon ko gudgudaya aur na lipTe KHar daman ko