kahan talash karun ab ufuq kahani ka

kahāñ talāsh karūñ ab ufuq kahānī kā

mizāj kaun samajhtā hai bahte paanī kā

ġhurūb hote hī sūraj ubharne lagtā hai

mire vajūd meñ sahrā zarar-fishānī kā

vo peḌ jis meñ faqat be-libās shāḳheñ thiiñ

usī se kaam liyā maiñ ne sā.ebānī kā

karūñ kahāñ se shurūa aur kahāñ pe ḳhatm karūñ

sirā hī miltā nahīñ vaqt kī kahānī kā

mujhe ginā.e ga.e vasf mere dushman ke

atā kiyā gayā mansab qasīda-ḳhvāni kā

bahār surḳh-qabā hai chaman sharār-ba-dosh

hamāre shahr meñ mausam hai gul-fishānī kā

qasam thī abr ko bhī mehrbāñ na hone kī

mujhe bhī karnā thā iz.hār saḳht-jānī kā

qadam baḌhānā mirā vādī-e-tahayyur meñ

tilism TūTnā sahrā-e-be-karānī kā

ye khiḌkiyāñ ye darīche nahīñ haiñ āñkheñ haiñ

makān meñ bhī hai ehsās be-makānī kā

vo gul-mizāj jo masrūf-e-guftugū ho kabhī

ḳhayāl aatā hai dariyāoñ kī ravānī kā

vo tarjume ke liye us ke ḳhāl-o-ḳhad na paḌhe

jise hunar nahīñ aatā hai tarjumānī kā

chalan se ho gayā bāhar to aur kyā kartā

libās utaar diyā maiñ ne be-zabānī kā

utar ke harf ke bātin meñ dekhnā 'yāvar'

jo raqs dekhnā ho sho.ala-e-ma.ānī kā

kahan talash karun ab ufuq kahani ka

mizaj kaun samajhta hai bahte pani ka

ghurub hote hi suraj ubharne lagta hai

mere wajud mein sahra zarar-fishani ka

wo peD jis mein faqat be-libas shaKHen thin

usi se kaam liya main ne saebani ka

karun kahan se shurua aur kahan pe KHatm karun

sira hi milta nahin waqt ki kahani ka

mujhe ginae gae wasf mere dushman ke

ata kiya gaya mansab qasida-KHwani ka

bahaar surKH-qaba hai chaman sharar-ba-dosh

hamare shahr mein mausam hai gul-fishani ka

qasam thi abr ko bhi mehrban na hone ki

mujhe bhi karna tha izhaar saKHt-jaani ka

qadam baDhana mera wadi-e-tahayyur mein

tilism TuTna sahra-e-be-karani ka

ye khiDkiyan ye dariche nahin hain aankhen hain

makan mein bhi hai ehsas be-makani ka

wo gul-mizaj jo masruf-e-guftugu ho kabhi

KHayal aata hai dariyaon ki rawani ka

wo tarjume ke liye us ke KHal-o-KHad na paDhe

jise hunar nahin aata hai tarjumani ka

chalan se ho gaya bahar to aur kya karta

libas utar diya main ne be-zabani ka

utar ke harf ke baatin mein dekhna 'yawar'

jo raqs dekhna ho shoala-e-maani ka