kahan thi itni majal banda zarur wo koi aur hoga

kahāñ thī itnī majāl banda zarūr vo koī aur hogā

tumhārā shikva mirī zabāñ par huzūr vo koī aur hogā

tumhārī dānishvarī ke sadqe ki baat majzūb kī na samjhe

jo ramz-e-irfāñ se āshnā ho shu.ūr vo koī aur hogā

mujhe to kuchh ġham nahīñ hai vaa.iz ki maiñ to mast-e-mai-e-azal huuñ

sharāb-e-kausar tumheñ mubārak surūr vo koī aur hogā

tumhāre dīdār kī badaulat har ek lahza hameñ qayāmat

ye dil to betāb hai azal se subūr vo koī aur hogā

bapā hai ik hashr dil meñ paiham nahīñ hai mahshar kā ham ko kuchh ġham

ye maanā yaum-un-nushūr hogā nushūr vo koī aur hogā

kahan thi itni majal banda zarur wo koi aur hoga

tumhaara shikwa meri zaban par huzur wo koi aur hoga

tumhaari danishwari ke sadqe ki baat majzub ki na samjhe

jo ramz-e-irfan se aashna ho shuur wo koi aur hoga

mujhe to kuchh gham nahin hai waiz ki main to mast-e-mai-e-azal hun

sharab-e-kausar tumhein mubarak surur wo koi aur hoga

tumhaare didar ki badaulat har ek lahza hamein qayamat

ye dil to betab hai azal se subur wo koi aur hoga

bapa hai ek hashr dil mein paiham nahin hai mahshar ka hum ko kuchh gham

ye mana yaum-un-nushur hoga nushur wo koi aur hoga