kahe deta hun go hai to nahin ye baat kahne ki

kahe detā huuñ go hai to nahīñ ye baat kahne kī

tirī ḳhvāhish nahīñ dil meñ ziyāda der rahne kī

bachā kar dil guzartā jā rahā huuñ har ta’alluq se

kahāñ us aable ko taab hai ab choT sahne kī

rag-o-pai meñ na hañgāma kare to kyā kare āḳhir

ijāzat jab nahīñ is rañj ko āñkhoñ se bahne kī

bas apnī apnī tarjīhāt apnī apnī ḳhvāhish hai

tujhe shohrat kamāne kī mujhe ik she'r kahne kī

jahāñ kā huuñ vahīñ kī raas aa.egī fazā mujh ko

ye duniyā bhī bhalā koī jagah hai mere rahne kī

jo kal 'irfān' par guzrī sunā kuchh us ke baare meñ

ḳhabar tum ne sunī tūfān meñ dariyā ke bahne kī

kahe deta hun go hai to nahin ye baat kahne ki

teri KHwahish nahin dil mein ziyaada der rahne ki

bacha kar dil guzarta ja raha hun har ta’alluq se

kahan us aable ko tab hai ab choT sahne ki

rag-o-pai mein na hangama kare to kya kare aaKHir

ijazat jab nahin is ranj ko aankhon se bahne ki

bas apni apni tarjihat apni apni KHwahish hai

tujhe shohrat kamane ki mujhe ek she'r kahne ki

jahan ka hun wahin ki ras aaegi faza mujh ko

ye duniya bhi bhala koi jagah hai mere rahne ki

jo kal 'irfan' par guzri suna kuchh us ke bare mein

KHabar tum ne suni tufan mein dariya ke bahne ki