kahen kis se sunaen kis ko ab dard-e-nihan apna

kaheñ kis se sunā.eñ kis ko ab dard-e-nihāñ apnā

usī ne raaz kholā jo banā thā rāz-dāñ apnā

samajh baiThe junūn-e-shauq meñ saarā jahāñ apnā

na raas aaya jahāñ ham ne banāyā āshiyāñ apnā

safar kaisā rahā manzil thī kaisī ab ye mat pūchho

vo saa.at nahs thī jis vaqt niklā kārvāñ apnā

muazziz ġhair jis husn-e-bayāñ zor-e-bayāñ par hai

hamīñ the lā.eq-e-tāzīr gar hotā bayāñ apnā

fareb-e-bārhā par hai vahī husn-e-gumāñ un se

kise ma.alūm ab kyā gul khilā.egā gumāñ apnā

in ahl-e-zauq kā mat pūchho anjām-e-safar kyā ho

na samjhā jin kā ḳhud zauq-e-safar sūd-o-ziyāñ apnā

talāsh-e-nāravā meñ ab agar ahl-e-talab bhaTke

nahīñ din duur jab kho baiTheñge nām-o-nishāñ apnā

nasheman chhin gayā ham par-burīda is liye chup haiñ

'zubair' ab juz qafas koī Thikānā hī kahāñ apnā

kahen kis se sunaen kis ko ab dard-e-nihan apna

usi ne raaz khola jo bana tha raaz-dan apna

samajh baiThe junun-e-shauq mein sara jahan apna

na ras aaya jahan hum ne banaya aashiyan apna

safar kaisa raha manzil thi kaisi ab ye mat puchho

wo saat nahs thi jis waqt nikla karwan apna

muazziz ghair jis husn-e-bayan zor-e-bayan par hai

hamin the laeq-e-tazir gar hota bayan apna

fareb-e-barha par hai wahi husn-e-guman un se

kise malum ab kya gul khilaega guman apna

in ahl-e-zauq ka mat puchho anjam-e-safar kya ho

na samjha jin ka KHud zauq-e-safar sud-o-ziyan apna

talash-e-narawa mein ab agar ahl-e-talab bhaTke

nahin din dur jab kho baiThenge nam-o-nishan apna

nasheman chhin gaya hum par-burida is liye chup hain

'zubair' ab juz qafas koi Thikana hi kahan apna