kahen kya tujhse hum o ahd-o-paiman bhulne wale

kaheñ kyā tujh se ham o ahd-o-paimāñ bhūlne vaale

bhulāyā ham ko tū ne tere qurbāñ bhūlne vaale

na vo apne taġhāful tā-ba-imkāñ bhūlne vaale

na ham bhūle hue va.adoñ kā ehsāñ bhūlne vaale

hamīñ haiñ qātiloñ meñ jī bajā irshād hotā hai

hamīñ haiñ muntazir ḳhūn-e-shahīdāñ bhūlne vaale

zamīñ ḳhuld-e-barīñ ye ham ko dhokā de nahīñ saktī

vo koī aur hoñge kū-e-jānāñ bhūlne vaale

kabhī bhūle se jab merī vafā.eñ yaad aatī haiñ

to kyā kyā dil meñ hote haiñ pashemāñ bhūlne vaale

yahī shart-e-vafā thī chāhne vāloñ se o zālim

zarā āñkheñ milā o ahd-o-paimāñ bhūlne vaale

daġhā kī hai muqaddar ne kahāñ ġhurbat nasīboñ se

kidhar jā.eñge ab rāh-e-bayābāñ bhūlne vaale

rahe jaate haiñ pīchhe maz.hab-o-millat ke shaidā.ī

baḌhe jaate haiñ aage dīn-o-īmāñ bhūlne vaale

ḳhudā aa aa gayā hai yaad vo vo zulm Dhaa.e haiñ

kahīñ 'safdar' butoñ ko haiñ musalmāñ bhūlne vaale

kahen kya tujh se hum o ahd-o-paiman bhulne wale

bhulaya hum ko tu ne tere qurban bhulne wale

na wo apne taghaful ta-ba-imkan bhulne wale

na hum bhule hue wadon ka ehsan bhulne wale

hamin hain qatilon mein ji baja irshad hota hai

hamin hain muntazir KHun-e-shahidan bhulne wale

zamin KHuld-e-barin ye hum ko dhoka de nahin sakti

wo koi aur honge ku-e-jaanan bhulne wale

kabhi bhule se jab meri wafaen yaad aati hain

to kya kya dil mein hote hain pasheman bhulne wale

yahi shart-e-wafa thi chahne walon se o zalim

zara aankhen mila o ahd-o-paiman bhulne wale

dagha ki hai muqaddar ne kahan ghurbat nasibon se

kidhar jaenge ab rah-e-bayaban bhulne wale

rahe jate hain pichhe mazhab-o-millat ke shaidai

baDhe jate hain aage din-o-iman bhulne wale

KHuda aa aa gaya hai yaad wo wo zulm Dhae hain

kahin 'safdar' buton ko hain musalman bhulne wale