kahen to kya kahen KHair apni jaan hi ki nahin

kaheñ to kyā kaheñ ḳhair apnī jaan hī kī nahīñ

yahī ḳhabar hai ki koī ḳhabar ḳhushī kī nahīñ

ye vāqi.a hai ghar itne mile mile haiñ magar

ye sāneha hai kisī ko ḳhabar kisī kī nahīñ

tarab-kadoñ kī shab-afroziyāñ qayāmat haiñ

kahīñ kahīñ to koī had hī raushnī kī nahīñ

hazāroñ ho ga.e paivand ḳhaak isī ġham meñ

yahāñ to ḳhaak kī qīmat hai aadmī kī nahīñ

ye kaisā ek hī bastī meñ hai nizām-e-tulūa

kisī galī meñ sahar hai kisī galī meñ nahīñ

guzār dī hai isī pesh-o-pas meñ umr tamām

tamām umr meñ ik lahar zindagī kī nahīñ

ġhalat-navāoñ ko hai izn-e-āshiyāñ-bandī

jo ḳhush-navā hai bahut koī shāḳh usī kī nahīñ

kahen to kya kahen KHair apni jaan hi ki nahin

yahi KHabar hai ki koi KHabar KHushi ki nahin

ye waqia hai ghar itne mile mile hain magar

ye saneha hai kisi ko KHabar kisi ki nahin

tarab-kadon ki shab-afroziyan qayamat hain

kahin kahin to koi had hi raushni ki nahin

hazaron ho gae paiwand KHak isi gham mein

yahan to KHak ki qimat hai aadmi ki nahin

ye kaisa ek hi basti mein hai nizam-e-tulua

kisi gali mein sahar hai kisi gali mein nahin

guzar di hai isi pesh-o-pas mein umr tamam

tamam umr mein ek lahar zindagi ki nahin

ghalat-nawaon ko hai izn-e-ashiyan-bandi

jo KHush-nawa hai bahut koi shaKH usi ki nahin