kahin bahaar kahin par KHizan ka mausam hai

kahīñ bahār kahīñ par ḳhizāñ kā mausam hai

tamām shahr meñ sūd-o-ziyāñ kā mausam hai

na raas aa.egī ham ko abhī ye āb-o-havā

jahāñ ke ham haiñ nazar meñ vahāñ kā mausam hai

havā kī zid bhī vahī hai diye kī zid bhī vahī

ajab hikāyat-e-shab-zād-gāñ kā mausam hai

kaḌaktī bijliyāñ abr-e-siyāh bārish-e-sang

zamīñ se kah do abhī āsmāñ kā mausam hai

fazā meñ itr sī ḳhushbū ghulegī aur abhī

abhī fasāna-e-dil-dād-gāñ kā mausam hai

chhalak rahe haiñ sabhī dard mehrbāñ ho kar

uThāo haath ki āzār-e-jāñ kā mausam hai

ab is ke baad zamīñ rafta rafta hogī siyāh

abhī hai surḳh ki ye kushtagāñ kā mausam hai

yaqīn hai ki na.e barg-o-bār ā.eñge

yaqīñ ke shahr meñ ab ke gumāñ kā mausam hai

nigāh-e-shab meñ shab-e-raftagāñ guzār aa.e

nigāh-e-sub.h meñ ā.indagāñ kā mausam hai

kahin bahaar kahin par KHizan ka mausam hai

tamam shahr mein sud-o-ziyan ka mausam hai

na ras aaegi hum ko abhi ye aab-o-hawa

jahan ke hum hain nazar mein wahan ka mausam hai

hawa ki zid bhi wahi hai diye ki zid bhi wahi

ajab hikayat-e-shab-zad-gan ka mausam hai

kaDakti bijliyan abr-e-siyah barish-e-sang

zamin se kah do abhi aasman ka mausam hai

faza mein itr si KHushbu ghulegi aur abhi

abhi fasana-e-dil-dad-gan ka mausam hai

chhalak rahe hain sabhi dard mehrban ho kar

uThao hath ki aazar-e-jaan ka mausam hai

ab is ke baad zamin rafta rafta hogi siyah

abhi hai surKH ki ye kushtagan ka mausam hai

yaqin hai ki nae barg-o-bar aaenge

yaqin ke shahr mein ab ke guman ka mausam hai

nigah-e-shab mein shab-e-raftagan guzar aae

nigah-e-subh mein aaindagan ka mausam hai