kahin baiThne de dil ab mujhe jo hawas Tak main baja karun

kahīñ baiThne de dil ab mujhe jo havās Tak maiñ bajā karūñ

nahīñ taab mujh meñ ki jab talak tū phire to maiñ bhī phirā karūñ

tū hazār mujh ko satā parī terī chaah mujh se na chūTegī

mire dil kī to hai yahī ḳhushī tū jafā kare maiñ vafā karūñ

jūñhī bosa maiñ ne talab kiyā to kahā tujhe to nahīñ hai Dar

mujhe ḳhauf hai ki mabādā gar koī dekh le to maiñ kyā karūñ

mujhe muddatoñ se hai dard-e-dil jo kahā kuchh is kā ilaaj kar

to kahā ki is kī davā hai ye tū kahā kare maiñ sunā karūñ

jo nigah se chaah kī dekhiye to chaḌhā ke tyorī ye kahtā hai

terī is nigah kī sazā hai ye ki bas ab maiñ tujh se chhupā karūñ

kabhī us ke kūche meñ jā mile jo ba-kām-e-dil ghaḌī-do-ghaḌī

tū mujhe haiñ yaad vo makr-o-fan phir usī ke dil meñ maiñ jā girūñ

koī bolā tum ne 'nazīr' ko na jhiḌak diyā to kahā miyāñ

dil-o-jāñ se mujh pe fidā hai vo use kis tarah maiñ ḳhafā karūñ

kahin baiThne de dil ab mujhe jo hawas Tak main baja karun

nahin tab mujh mein ki jab talak tu phire to main bhi phira karun

tu hazar mujh ko sata pari teri chah mujh se na chuTegi

mere dil ki to hai yahi KHushi tu jafa kare main wafa karun

junhi bosa main ne talab kiya to kaha tujhe to nahin hai Dar

mujhe KHauf hai ki mabaada gar koi dekh le to main kya karun

mujhe muddaton se hai dard-e-dil jo kaha kuchh is ka ilaj kar

to kaha ki is ki dawa hai ye tu kaha kare main suna karun

jo nigah se chah ki dekhiye to chaDha ke tyori ye kahta hai

teri is nigah ki saza hai ye ki bas ab main tujh se chhupa karun

kabhi us ke kuche mein ja mile jo ba-kaam-e-dil ghaDi-do-ghaDi

tu mujhe hain yaad wo makr-o-fan phir usi ke dil mein main ja girun

koi bola tum ne 'nazir' ko na jhiDak diya to kaha miyan

dil-o-jaan se mujh pe fida hai wo use kis tarah main KHafa karun